ABŞ-ın “The Washington Free Beacon” nəşri Gürcüstanın hakim “Gürcü Arzusu” partiyasının idarəçiliyi dövründə Vaşinqtonun etibarlı tərəfdaşından İranın təsir dairəsinə yaxınlaşan dövlətə çevrildiyini iddia edib. Nəşrin məlumatına görə, Hudson İnstitutunda keçirilən müzakirədə amerikalı qanunvericilər və ekspertlər Tbilisinin İran İslam İnqilabı Keşikçiləri Korpusu — SEPAH üçün Avrasiyada yeni dayaq nöqtəsinə çevrildiyini bildiriblər.
Materialda qeyd olunur ki, Gürcüstanın İranla yaxınlaşması ABŞ-ın regiondakı təhlükəsizlik maraqları üçün risk kimi təqdim edilir. Hudson İnstitutunun tədbirində bildirilib ki, İran Gürcüstandakı şiə icmaları, xüsusilə də, etnik azərbaycanlıların yaşadığı Kvemo Kartli bölgəsi üzərindən təsir şəbəkələri qurmağa çalışır. udson İnstitutu da tədbirin anonsunda Gürcüstanın vaxtilə ABŞ-ın Qara dəniz regionundakı ən etibarlı strateji tərəfdaşlarından biri olduğunu, lakin son dövrdə “Gürcü Arzusu” hökumətinin İran da daxil olmaqla ABŞ rəqiblərinə daha çox yaxınlaşdığını qeyd edib.
Nümayəndələr Palatasının Xarici İşlər Komitəsinin üzvü Co Uilson vəziyyəti “Gürcüstan kabusu” adlandırıb. O bildirib ki, “Gürcü Arzusu” hökuməti Rusiya hərbi-nəqliyyat təyyarələrinin Gürcüstan hava məkanından keçərək İrana yüklər daşımasına imkan verməklə Tehran rejiminə dəstək göstərib və prezident Donald Trampın mövqelərini zəiflədib.
Nəşr Hudson İnstitutunun son araşdırmasına istinadən yazır ki, İran Gürcüstanda “yeni strateji platforma” formalaşdırır və ölkəni kəşfiyyat cəlbetməsi, ideoloji təsir və mümkün paramilitar mobilizasiya üçün münbit mühit kimi görür. Hudson İnstitutunun ekspertlərindən Lyuk Koffi bildirib ki, Gürcüstan vətəndaşlarının Avropa Şengen zonasına və ABŞ-a nisbətən asan hərəkət imkanı İran üçün əlavə risk faktoru yaradır.
Araşdırmada İranın əsas hədəflərindən biri kimi Gürcüstandakı şiə azlığı göstərilir. RFE/RL-in mart ayında dərc etdiyi materialda da qeyd olunur ki, Gürcüstan Dövlət Təhlükəsizliyi Xidməti İranın ölkədə şiə icmaları vasitəsilə təsirini artırması ilə bağlı iddiaları araşdırmağa başlayıb. Həmin materialda Hudson İnstitutunun hesabatına və gürcü müxalifət siyasətçilərinin açıqlamalarına istinadən İranın xüsusilə Kvemo Kartlidəki etnik azərbaycanlı şiə icmalar arasında nüfuz şəbəkəsi qurmağa çalışdığı bildirilir.
“The Washington Free Beacon”un materialında İranla əlaqəli xeyriyyə qurumları və “Əl-Mustafa” Beynəlxalq Universiteti xüsusi vurğulanır. ABŞ Maliyyə Nazirliyi 2020-ci ildə bu universiteti SEPAH-ın Qüds qüvvələri üçün kəşfiyyat və xarici əməliyyatlara resurs təmin etməkdə ittiham edərək sanksiya siyahısına daxil etmişdi. Nəşrin yazdığına görə, keçmiş gürcü deputat Georgi Kandelaki “Əl-Mustafa”nın Gürcüstanda üç kampusunun olduğunu və bu strukturun illik büdcəsinin təxminən 100 milyon dollar təşkil etdiyini bildirib.
RFE/RL isə məsələ ilə bağlı daha ehtiyatlı qiymətləndirmə təqdim edir. Gürcüstan Dövlət Təhlükəsizliyi Xidməti RFE/RL-ə bildirib ki, İranın ölkədə təsir şəbəkəsi qurması ilə bağlı iddialar mövcud sübutlarla ziddiyyət təşkil edir və qurum bu iddiaların arxasındakı motivləri araşdırır. Bununla yanaşı, RFE/RL qeyd edir ki, Gürcüstanda İranla əlaqəli təxminən 13 min şirkətin qeydiyyatda olması sanksiyalardan yayınma ehtimalı ilə bağlı suallar doğurur.
Beləliklə, Vaşinqtondakı müzakirələr Gürcüstanın xarici siyasət kursu ətrafında artan narahatlığı yenidən gündəmə gətirib. ABŞ-dakı tənqidçilər “Gürcü Arzusu” hökumətini İran, Rusiya və Çinlə yaxınlaşmaqda ittiham edir, Tbilisi isə bu iddiaların siyasi motivli olduğunu bildirir. Hazırkı mərhələdə SEPAH-ın Gürcüstanı Avrasiya platforması kimi istifadə etməsi barədə iddialar əsasən Hudson İnstitutunun araşdırması, ABŞ qanunvericilərinin açıqlamaları və media materialları əsasında səslənir.
