Fransada “Milli Birlik” (RN) partiyasının hakimiyyətə gələcəyi təqdirdə ictimai yerlərdə islam baş örtüyünün taxılmasını qadağan etmək və buna görə cərimə tətbiq etmək planına etiraz olaraq sosial şəbəkələrdə həmrəylik aksiyası genişlənir.
MSNews.az xəbər verir ki, “Le Parisien” son günlər adətən hicab taxmayan çoxsaylı qadınların başlarını örtərək foto və videolar paylaşdığını yazır. Aksiyaya müsəlman olmayan qadınlarla yanaşı kişilər də qoşulub. Bəzi iştirakçılar mümkün qadağa qüvvəyə minərsə, müsəlman qadınlarla həmrəylik məqsədilə özlərinin də baş örtüyü taxacağını bildiriblər.
Sosial şəbəkələrdə yayılan videolardan birində xristian olduğunu bildirən qadın qadağa tətbiq ediləcəyi halda hicab taxmağa hazır olduğunu deyib. Kişilər arasında da başını örtərək video paylaşanlar olub, iştirakçılardan biri isə baş örtüyünün necə taxılması ilə bağlı qısa təlimat yayımlayıb. “Le Parisien” aksiyanın RN-in təklifinə qarşı artan etiraz dalğasının bir hissəsi olduğunu bildirir.
Müzakirələr RN deputatı Jan-Filipp Tanjüyin avqustun 30-da partiyanın hakimiyyətə gələcəyi təqdirdə ictimai yerlərdə hicab taxılmasını qadağan etməyi və qaydanı pozan qadınlara cərimə tətbiq etməyi planlaşdırdığını açıqlamasından sonra güclənib. Tanjüy bu tədbirin Marin Le Pen prezident seçkilərində qalib gələcəyi halda həyata keçirilməsinin nəzərdə tutulduğunu bildirib.
Fransa hökuməti isə təkliflə bağlı hüquqi şübhələrini açıqlayıb. Hökumət sözçüsü Mo Bregeon tədbirin həm konstitusiyaya uyğunluğu, həm də praktikada tətbiqi baxımından “açıq suallar” yaratdığını bildirib. RN daxilində aparılan müzakirələrdən sonra partiyanın ictimai yerlərdə hicab qadağasını yenidən siyasi gündəmə gətirdiyi bildirilir.
Hazırda Fransada adi hicabın ictimai yerlərdə taxılmasına ümumi qadağa yoxdur. Fransanın rəsmi dünyəvilik portalına görə, insanlar ictimai məkanda dini geyim və simvollarla öz inanclarını ifadə edə bilərlər, bir şərtlə ki, bu, ictimai asayişi pozmasın. Mövcud qanun isə üzü tanınmaz hala gətirən geyimləri, o cümlədən niqab və burqa kimi tam üz örtüklərini ictimai yerlərdə qadağan edir.
