Fransanın “Monako” klubu baş məşqçi postuna Filipe Luisi gətirməyə hazırlaşır. Transfer insayderi Fabrizio Romanonun məlumatına görə, braziliyalı mütəxəssis Liqa 1 təmsilçisi ilə 2 illik müqavilə imzalayacaq.
“TalkSport” da yazır ki, Filipe Luis “Monako”nun yeni baş məşqçisi olmağa yaxındır və klubda Sebastyen Pokonyolini əvəz edəcək. (Talksport)
Məlumata görə, “Monako” Filipe Luisi yeni mövsüm üçün əsas layihənin rəhbəri kimi görür. Klub ötən mövsümü Liqa 1-də 7-ci pillədə başa vurub və Çempionlar Liqası, eləcə də Avropa Liqasına vəsiqə qazana bilməyib. Bununla belə, komanda növbəti mövsüm UEFA Konfrans Liqasının pley-off mərhələsində çıxış edəcək.
Filipe Luis məşqçilik karyerasına “Flamenqo”da uğurlu başlanğıc etmişdi. O, Braziliya klubunda qısa müddətdə 5 titul qazanıb. Bu uğurlar arasında 2024-cü il Braziliya Kuboku, 2025-ci ildə isə Braziliya çempionluğu və Libertadores Kuboku da var. Buna baxmayaraq, “Flamenqo” mart ayında onu gözlənilmədən istefaya göndərmişdi.
“The Guardian” isə Filipe Luisin “Flamenqo”dan göndərilməsini Braziliya futbolunun ən qəribə qərarlarından biri kimi təqdim etmişdi. Çünki o, komandanın “Madureyra” üzərində 8:0 hesablı qələbəsindən az sonra vəzifəsindən uzaqlaşdırılmışdı.
Braziliyalı mütəxəssis futbolçu kimi “Atletiko Madrid”, “Çelsi” və “Flamenqo”da çıxış edib. İndi isə o, Avropada məşqçi kimi ilk ciddi layihəsinə başlamağa hazırlaşır. “Monako” ilə razılaşma rəsmiləşərsə, bu, Filipe Luisin Avropa futbolunda baş məşqçi kimi debütü olacaq.
