FIFA İsrail və Fələstin arasında simvolik futbol oyunu keçirməyi nəzərdən keçirir.
MSNews.az xəbər verir ki, “The Guardian”ın məlumatına görə, FIFA bu ilin sentyabrında ABŞ-da keçiriləcək yeni U-15 futbol festivalının açılış matçında İsrail və Fələstin komandalarının üz-üzə gəlməsini istəyir.
Turnir rəsmi U-15 Dünya Kuboku statusu daşımayacaq. Bununla belə, yarışın FIFA-ya üzv olan bütün 211 assosiasiya üçün açıq olacağı bildirilir.
“The Times” yazır ki, ideya FIFA rəhbərliyi səviyyəsində müzakirə olunur, lakin hələlik İsrail və Fələstin futbol assosiasiyalarına rəsmi təklif kimi təqdim edilməyib. Nəşrin məlumatına görə, Fələstin tərəfinin bu plana qarşı çıxacağı ehtimal olunur.
Plan FIFA prezidenti Canni İnfantinonun futbolu sülh və dialoq vasitəsi kimi təqdim etmək istəyinin davamı hesab olunur. İnfantino daha əvvəl apreldə Vankuverdə keçirilən FIFA Konqresində İsrail və Fələstin futbol rəsmilərini bir araya gətirməyə çalışmışdı.
Lakin həmin cəhd uğursuz olmuşdu. Fələstin Futbol Assosiasiyasının prezidenti Cibril Racub İsrail Futbol Assosiasiyasının vitse-prezidenti Basim Şeyx Süleymanla eyni səhnədə dayanmaqdan imtina etmişdi.
“The Athletic” də FIFA-nın açılış oyunu kimi İsrail – Fələstin matçını təklif etdiyini yazıb. Məlumata görə, mümkün oyun ABŞ-da keçiriləcək yeni yeniyetmə futbol festivalının əsas simvolik hadisəsi kimi nəzərdən keçirilir.
“Jerusalem Post”un məlumatına görə, turnirin sentyabrda ABŞ-da keçirilməsi planlaşdırılır və Mayami mümkün ev sahibi şəhərlərdən biri kimi göstərilir.
FIFA hələlik matçın keçiriləcəyi yer, tarix və iştirakçı federasiyaların mövqeyi ilə bağlı yekun qərar açıqlamayıb.
