İsraildə 27 oktyabrda keçiriləcək parlament seçkilərinə az müddət qalarkən siyasi bloklar arasında mübarizə daha da gərginləşir. QAFSAM eksperti, siyasi şərhçi Novruzəli Yusubzadə hesab edir ki, seçkinin nəticələri təkcə İsrailin daxili siyasətinə deyil, İranla münasibətlərin növbəti mərhələsinə də təsir göstərə bilər. Seçkilərin 27 oktyabrda keçirilməsi rəsmən müəyyən edilib.
Yusubzadənin fikrincə, diqqət edilməli əsas fiqurlardan biri keçmiş Baş Qərargah rəisi Qadi Eyzenkotdur.
“Eyzenkot Bennett-Lapid xəttinə tam şəkildə daxil olmaqda tələsmir. Onun seçimi ümumi siyasi balans və hökumətin formalaşdırılması baxımından mühüm ola bilər”.
Eyzenkotun rəhbərlik etdiyi “Yaşar” partiyasının ayrıca siyasi xətt saxlaması və Bennett-Lapid ittifaqına birləşməməsi İsrail mediasında da seçki öncəsi əsas siyasi dəyişənlərdən biri kimi qiymətləndirilir.
Yusubzadə bildirir ki, uzun müddət aparılan sorğularda Netanyahu əleyhdarı sionist blokun təxminən 58-59 mandat ətrafında görünməsi parlament çoxluğu üçün lazım olan 61 mandat sərhədini xüsusilə vacib edib.
Avqust sorğularında müxalifət blokunun həqiqətən də 58-59 mandat ətrafında olduğu göstərilirdi. Lakin seçkiyə iki həftədən az qalmış daha yeni sorğularda rəqəmlər dəyişib: bəzi son ölçmələrdə həm Netanyahu tərəfdarları, həm də əsas müxalif blok 61 mandatdan xeyli aşağı qalır, “Jerusalem Post” isə müxalif blokun son həftələrdə 52-53 mandat səviyyəsinə endiyini yazır.
“Netanyahu üçün hökumətin kilidlənməsi və baş nazir postunun itirilməsi ən arzuolunmaz ssenaridir. Buna görə seçkidən əvvəl atılan hər addımın daxili siyasi nəticəsi də hesablanır”.
Ekspert hesab edir ki, İranla yeni hərbi qarşıdurma ehtimalı İsrail siyasətində seçki kampaniyasından ayrıca qiymətləndirilə bilməz.
“Müxalifətin Netanyahuya qarşı əsas tezislərindən biri onun İranla qarşıdurmadan daxili siyasi üstünlük üçün istifadə etməsidir. Buna görə Netanyahu üçün seçkidən əvvəl yeni böyük müharibəyə başlamaq əlavə siyasi risk yarada bilər”.
Netanyahu özü də oktyabrın 14-də seçkidən əvvəl İrana preventiv hücum axtarışında olmadığını bildirib və opponentlərinin onun müharibədən seçki məqsədi ilə istifadə edə biləcəyi barədə ittihamlarını rədd edib.
Yusubzadə isə bunun seçkidən sonrakı dövrə dair təhlükəni avtomatik aradan qaldırmadığını düşünür:
“Məncə, mümkün yeni raund üçün seçkidən sonrakı dövr daha əlverişli siyasi zaman ola bilər. Seçki bitdikdən və hökumətin formalaşdırılması prosesi başladıqdan sonra İran məsələsi yenidən İsrail təhlükəsizlik gündəminin əsas mövzularından birinə çevrilə bilər”.
Onun qənaətinə görə, seçkidən sonra parlamentdə yenə parçalanmış mənzərə yaranarsa, İranla bağlı təhlükəsizlik gündəliyi Netanyahu üçün daxili siyasi konsolidasiyanın əsas mövzularından birinə çevrilə bilər.
