Ermənistan Prezidenti Vaaqn Xaçaturyan baş nazir Nikol Paşinyanın təqdimatları əsasında yeni hökumətin üzvlərinin təyin edilməsi haqqında fərmanlar imzalayıb.
MSNews.az xəbər verir ki, Mher Qriqoryan və Tiqran Xaçatryan baş nazirin müavinləri vəzifələrinə yenidən təyin ediliblər. Fərmanlar Ermənistan Prezidentinin rəsmi saytında dərc olunub.
Yeni hökumətdə əsas dəyişiklik Yüksək Texnologiyalar Sənayesi Nazirliyində baş verib. David Tadevosyan bu qurumun rəhbəri təyin olunub. O, kabinetdə vəzifəyə yeni gətirilən yeganə şəxsdir.
Bu barədə “Armenia Today” məlumat yayıb.
Prezidentin fərmanlarına əsasən, hökumətin tərkibi belə formalaşıb:
- Mher Qriqoryan — baş nazirin müavini;
- Tiqran Xaçatryan — baş nazirin müavini;
- David Tadevosyan — yüksək texnologiyalar sənayesi naziri;
- David Xudatyan — ərazi idarəetməsi və infrastruktur naziri;
- Suren Papikyan — müdafiə naziri;
- Ambartsum Matevosyan — ətraf mühit naziri;
- Arpine Sarkisyan — daxili işlər naziri;
- Janna Andreasyan — təhsil, elm, mədəniyyət və idman naziri;
- Ararat Mirzoyan — xarici işlər naziri;
- Srbuhi Qalyan — ədliyyə naziri;
- Anahit Avanesyan — səhiyyə naziri;
- Arsen Torosyan — əmək və sosial məsələlər naziri.
Beləliklə, David Tadevosyan istisna olmaqla, siyahıdakı digər hökumət üzvləri əvvəlki vəzifələrini qoruyublar.
Təyinatlar Ermənistan Konstitusiyasının hökumət üzvlərinin baş nazirin təqdimatı əsasında prezident tərəfindən təyin edilməsini nəzərdə tutan müddəalarına uyğun rəsmiləşdirilib.
