Ermənistan ordunun hücum dronları ilə təchizatını genişləndirmək üçün 500 kilometrədək mənzilə malik pilotsuz uçuş aparatlarının alınmasını nəzərdən keçirir. Ermənistanın “Hraparak” nəşrinin məlumatına görə, ölkənin Müdafiə Nazirliyi xarici istehsalçıların müxtəlif PUA modellərini müqayisə edib.
MSNews.az xəbər verir ki, nəşr Ermənistanın yerli PUA istehsalçıları ilə əməkdaşlığı davam etdirməklə yanaşı, ordunun daha genişmiqyaslı təchizatını planlaşdırdığını yazıb.
Məlumata əsasən, araşdırma zamanı ABŞ, Fransa, İran, Ukrayna, İsrail, Hindistan, Çin və Rusiya istehsalı olan dronlar nəzərdən keçirilib. “Hraparak”ın iddiasına görə, erməni hərbi mütəxəssisləri qiymətini, süni intellekt imkanlarını və qrup halında istifadə xüsusiyyətlərini nəzərə alaraq Hindistanın “Divyastra MK-1” modelini uyğun variant hesab ediblər.
Dronu istehsal edən Hindistanın “HoverIT” şirkətinin açıqladığı texniki göstəricilərə görə, “Divyastra MK-1” 500 kilometrədək əməliyyat mənzilinə, beş saatadək uçuş müddətinə və 15 kiloqramadək faydalı yük daşımaq imkanına malikdir. İstehsalçı PUA-nın süni intellektdən istifadə və qrup şəklində əməliyyat aparmaq üçün nəzərdə tutulduğunu bildirir.
“Hraparak” yazır ki, Ermənistanın müxtəlif ölkələrdən dron alması müəyyən xarici tərəfdaşlarla münasibətlərində fikir ayrılıqları yarada bilər. Nəşr Hindistan variantına marağı həm də bu siyasi amillərlə əlaqələndirir.
Ermənistan Müdafiə Nazirliyinin “Divyastra MK-1” dronlarının alınmasına dair rəsmi qərarı, müqavilə imzalanması və ya tədarükün başlanması barədə təsdiqlənmiş məlumat yoxdur. Hazırda söhbət nəşrin mümkün satınalma planlarına dair yaydığı məlumatdan gedir.
