Kriştianu Ronaldunun çıxış etdiyi “Ən-Nəsr” klubunun borcları 800 milyon Səudiyyə riyalını — təxminən 180 milyon avronu keçib.
MSNews.az xəbər verir ki, bu barədə Səudiyyə Ərəbistanının “Ər-Riyadiyyə” nəşri Səudiyyə Ərəbistanının Dövlət İnvestisiya Fonduna yaxın mənbəyə istinadən məlumat yayıb. Borcların böyük hissəsinin ötən mövsümdə qəbul edilən maliyyə qərarları nəticəsində yarandığı bildirilir.
Məlumatda borcun Kriştianu Ronaldoya ödənilməli olan məbləğ olduğu qeyd edilmir. Söhbət klubun futbolçular, məşqçilər, transferlər və digər əməliyyatlarla bağlı ümumi maliyyə öhdəliklərindən gedir. Borcun konkret olaraq hansı tərəflər arasında bölüşdürüldüyü isə açıqlanmayıb.
Maliyyə böhranı fonunda Dövlət İnvestisiya Fondu klubun icraçı rəhbərliyinin bəzi maliyyə səlahiyyətlərini məhdudlaşdırmağa başlayıb. “Ən-Nəsr” yeni futbolçu və ya məşqçi ilə yalnız sponsorluq müqavilələri və klubun öz gəlirləri hesabına lazımi maliyyə təminatı yaradıldıqdan sonra müqavilə bağlaya biləcək.
Buna görə yaranmış vəziyyəti FİFA tərəfindən tətbiq edilmiş klassik transfer qadağası kimi qiymətləndirmək düzgün deyil. Məhdudiyyət klubun kifayət qədər likvid vəsait olmadan yeni öhdəlik götürməsinin qarşısını almağı nəzərdə tutan daxili maliyyə nəzarətidir.
PIF böhrandan çıxış üçün üç istiqamət müəyyənləşdirib. Bunlara klub rəhbərliyinin maliyyə səlahiyyətlərinin məhdudlaşdırılması, müstəqil maliyyə, hüquq və kommersiya məsləhətçilərinin cəlb edilməsi, həmçinin klubun səhmlərinin satılması ilə bağlı təkliflərin araşdırılması daxildir.
“Ər-Riyadiyyə” yazır ki, fondun masasında “Ən-Nəsr”in alınması ilə bağlı iki ciddi təklif var. PIF klubun tam satılmasından daha çox, qismən sərmayə cəlb edilməsinə üstünlük verir. Potensial alıcıların adları və təkliflərin maliyyə şərtləri açıqlanmayıb.
Məlumata görə, görülən tədbirlərin məqsədi borcların daha da artmasının qarşısını almaq, klubun kommersiya dəyərini qorumaq və xərcləri gəlirlərə uyğunlaşdırmaqdır. “Ən-Nəsr” Səudiyyə Peşəkar Futbol Liqası tərəfindən gücləndirilmiş maliyyə nəzarəti altında saxlanılır.
“Goal” nəşrinin məlumatına görə, maliyyə çatışmazlığı futbolçuların iyun ayı maaşlarının tam ödənilməməsinə və bəzi planlaşdırılan transferlərin gecikməsinə də səbəb olub. Bununla belə, bu detallar klub tərəfindən rəsmi şəkildə təsdiqlənməyib.
