Fransa Prezidenti Emmanuel Makronun həyat yoldaşı Bricit Makronun kişi olaraq doğulduğuna dair iddiaları ilə tanınan fransalı jurnalist Nataşa Reyin sentyabrın 13-də xərçəng xəstəliyindən vəfat etdiyi bildirilir. Onun ölüm xəbərini həmkarı Ksavye Pussar açıqlayıb.
MSNews.az xəbər verir ki, bu barədə Fransanın “La Dépêche” qəzeti məlumat yayıb.
Pussarın sentyabrın 18-də sosial şəbəkədə paylaşdığı məlumata görə, Rey Fransanın Şarant-Maritim departamentinin Sent şəhərində xərçəng xəstəliyindən vəfat edib.
O, jurnalistin sentyabrın 18-də Sen-Palle kilsəsində keçiriləcək dini mərasimdən sonra eyniadlı qəbiristanlıqda dəfn olunacağını da bildirib. Bununla belə, ölüm xəbəri və onun detalları hələlik müstəqil mənbələr tərəfindən tam təsdiqlənməyib.
Nataşa Rey 2021-ci ildə Bricit Makronun kişi olaraq doğulduğunu iddia edən materialların yayılmasından sonra geniş tanınmışdı. Lakin bu iddialar etibarlı sübutlarla təsdiqlənməyib və Makron ailəsi tərəfindən rədd edilib.
2024-cü ilin sentyabrında Paris məhkəməsi Rey və bloqer Amandin Ruanı Bricit Makronla bağlı yaydıqları iddialara görə diffamasiya işində təqsirli bilib.
2025-ci ilin iyulunda isə Paris Apellyasiya Məhkəməsi həmin hökmü ləğv edərək hər iki qadına bəraət verib. Məhkəmə mübahisəli ifadələrin hüquqi baxımdan diffamasiya təşkil edib-etmədiyini qiymətləndirib.
Qeyd edək ki, apellyasiya məhkəməsinin qərarı Bricit Makronun kişi olaraq doğulduğuna dair iddiaların doğruluğunun təsdiqlənməsi demək deyil. Makron ailəsi sonradan apellyasiya qərarından Fransa Kassasiya Məhkəməsinə şikayət edib.
