Almaniyanın “Borussiya Dortmund” klubunun futbolçuları UEFA Çempionlar Liqasında “Sabah”la Bakıdakı qarşılaşmadan sonra stadionda duş qəbul etməkdən imtina ediblər. Almaniya mətbuatı qərarın su sistemində legionella bakteriyasının mümkün mövcudluğu ilə bağlı narahatlıqdan qaynaqlandığını iddia edib.
MSNews.az xəbər verir ki, bu barədə Almaniyanın “Bild” nəşri məlumat yayıb. Oktyabrın 20-də Bakı Olimpiya Stadionunda keçirilən və Dortmund təmsilçisinin 2:1 hesablı qələbəsi ilə başa çatan oyundan sonra futbolçular duş qəbul etmədən komanda avtobusuna minərək otelə yollanıblar.
Nəşrin məlumatına görə, “Borussiya” rəhbərliyi stadionun su sistemində legionella bakteriyasının ola biləcəyi ehtimalını nəzərə alaraq risk etmək istəməyib. Bu bakteriyalar su damcılarının nəfəs yollarına düşməsi nəticəsində legionellyoz adlı ciddi infeksion xəstəliyə səbəb ola bilər.
Bununla belə, stadionun su sistemində legionella bakteriyasının aşkarlandığına dair təsdiqlənmiş məlumat yoxdur. Söhbət yalnız Almaniya nəşrinin irəli sürdüyü mümkün risk barədə iddiadan gedir.
“Borussiya”nın baş məşqçisi Niko Kovaç futbolçuların hələ oyundan əvvəl keçirilən məşqdən sonra da stadionda duş qəbul etmədiklərini açıqlayıb.
“Bizə burada deyil, oteldə duş qəbul etməli olduğumuz bildirildi. Buna görə də mümkün qədər tez otelə qayıtdıq”, – deyə mütəxəssis qeyd edib.
Klubun idman direktoru Ole Buk isə qərarı daha fərqli şəkildə izah edib.
“Düşünürəm ki, oteldəki duşlar daha cəlbedicidir. Buradakı duş sahəsi o qədər də yaxşı deyil”, – deyə o bildirib.
“Bild”in məlumatına əsasən, Dortmund klubu futbolçuların oyundan sonra duş qəbul etməsi və bərpası üçün qaldıqları otelin SPA zonasını əvvəlcədən ayırıb.
