Londonun “Arsenal” klubunun əfsanəvi sabiq baş məşqçisi Arsen Venger Beynəlxalq Futbol Federasiyaları Assosiasiyasının (FIFA) prezidenti vəzifəsinə namizədliyini irəli sürməyə hazırlaşır. 77 yaşlı fransalı mütəxəssis hazırkı prezident Canni İnfantinoya qarşı seçkilərdə iştirak etmək imkanını ciddi şəkildə nəzərdən keçirir.
MSNews.az xəbər verir ki, bu barədə Fransanın “L’Équipe” nəşri məlumat yayıb. Nəşrin yazdığına görə, Venger İnfantinonun daha dörd il vəzifədə qalmasının qarşısını almağı özünə mənəvi borc hesab edir.
Avropa futbolunun bir sıra nüfuzlu nümayəndələri Vengeri seçkilərdə iştirak etməyə təşviq edirlər. UEFA daxilində də İnfantinoya alternativ namizədin irəli sürülməsi istiqamətində müzakirələr aparılır.
Venger 2019-cu ildən FIFA-nın qlobal futbolun inkişafı üzrə rəhbəri vəzifəsində çalışır. Onun beynəlxalq futbol ictimaiyyətindəki nüfuzu və idarəçilik təcrübəsi mümkün namizədliyinə marağı artırıb.
“BBC Sport” nəşrinin məlumatına görə, Venger hələ yekun qərar verməyib, lakin seçkilərdə iştirak etmək ehtimalını əvvəlkindən daha ciddi qiymətləndirir.
Qeyd edək ki, FIFA prezident seçkiləri 2027-ci il martın 18-də Mərakeşin paytaxtı Rabatda keçiriləcək. Namizədlər noyabrın 18-dək müraciət etməlidirlər.
Hazırkı prezident Canni İnfantino növbəti müddət üçün namizədliyini irəli sürəcəyini təsdiqləyib.
