ABŞ Dövlət Departamenti Səudiyyə Ərəbistanına 48 ədəd F-35 “Lightning II” qırıcısı və əlaqəli avadanlıqların ümumi dəyəri 24,3 milyard dollaradək olan potensial satışını təsdiqləyib. Bu, Ər-Riyadın F-35 əldə etməsi istiqamətində indiyədək atılmış ən konkret addımdır.
MSNews.az xəbər verir ki, ABŞ administrasiyası sentyabrın 17-də Konqresi planlaşdırılan satış barədə rəsmi şəkildə məlumatlandırıb. Paketə 48 F-35 qırıcısı, 49 Pratt & Whitney F135 mühərriki, rabitə sistemləri, ehtiyat hissələri, təlim və texniki-logistika dəstəyi daxildir.
Dövlət Departamentinin bildirişində satışın ABŞ-ın xarici siyasət və milli təhlükəsizlik maraqlarına xidmət etdiyi, həmçinin Səudiyyə Ərəbistanının mövcud və gələcək təhdidlərə qarşı müdafiə imkanlarını artıracağı qeyd olunur. Vaşinqton sövdələşmənin regiondakı hərbi balansı dəyişməyəcəyini bildirir.
“Reuters” qeyd edir ki, Səudiyyə Ərəbistanı uzun müddətdir F-35 almaqda maraqlıdır. Satış yekunlaşarsa, krallıq Yaxın Şərqdə İsraildən sonra bu tip qırıcıları əldə edən ilk ərəb dövləti olacaq. Hazırda regionda F-35-dən yalnız İsrail istifadə edir.
Əsas podratçılar “Lockheed Martin” və “Pratt & Whitney” şirkətləri olacaq.
Bununla belə, söhbət hələ faktiki tədarükdən getmir. Dövlət Departamenti potensial satışı təsdiqləyib və Konqresə bildiriş göndərib. Sövdələşmə qanunvericilərin nəzərdən keçirməsindən keçməli, daha sonra müqavilə və istehsal mərhələləri tamamlanmalıdır. “Axios”-un məlumatına görə, ilk təyyarələrin təhvil verilməsi yekun razılaşmadan sonra bir neçə il çəkə bilər.
