ABŞ Senatının Demokrat fraksiyasına daxil olan 45 senator İsrailin Baş naziri Benjamin Netanyahuya müraciət edərək İordan çayının qərb sahilində israilli məskunlaşanların zorakılığının qarşısının alınması üçün təcili tədbirlər görülməsini tələb edib.
MSNews.az xəbər verir ki, avqustun 26-da göndərilən məktubun təşəbbüskarları senatorlar Adam Şiff, Senatdakı demokratların lideri Çak Şumer və Kori Buker olub. Sənədi Demokrat fraksiyasının demək olar ki, bütün üzvləri imzalayıb. Siyahıda müstəqil senator Anqus Kinq də yer alır.
Senatorlar məktubda İordan çayının qərb sahilində son həftələr ərzində təhdidlərin, hücumların və ölüm hallarının artmasından ciddi narahatlıq ifadə ediblər.
Məktubda bildirilir ki, məskunlaşanların ölümə səbəb olan zorakılıq halları artıq 2025-ci ilin göstəricilərini keçib. Senatorlar son həftələrdə həm israillilər, həm də fələstinlilər arasında gərginliyin artdığını, İsrail təhlükəsizlik qüvvələrinin genişmiqyaslı əməliyyatlar və kütləvi həbslər həyata keçirdiyini, həmçinin məskunlaşanların Fələstin məscidlərinə hücumları barədə məlumatların yayıldığını qeyd ediblər.
Qanunvericilər Netanyahudan İsrail polisi və ordusuna zorakılıq, təhdid və təqib hallarına müdaxilə etmək barədə açıq göstəriş verməsini tələb ediblər.
Bundan başqa, senatorlar fələstinlilərə, o cümlədən Fələstin əsilli ABŞ vətəndaşlarına qarşı hücumlarda iştirak edən şəxslərin şəffaf və etibarlı araşdırma nəticəsində məsuliyyətə cəlb olunmasını istəyiblər.
Məktubda xüsusi olaraq 2022-ci ildən bəri İordan çayının qərb sahilində israilli məskunlaşanlar və ya İsrail təhlükəsizlik qüvvələri tərəfindən öldürüldüyü bildirilən doqquz ABŞ vətəndaşının ölüm hallarının araşdırılmasının tamamlanması tələb olunur.
Senatorların digər əsas tələbi yaşayış məntəqələrinin genişləndirilməsinin dayandırılmasıdır.
Sənəddə Netanyahu hökumətinə yeni yaşayış məntəqələrinin təsdiq edilməsini dayandırmaq, qanunsuz forpostların tikintisinə yol verməmək və mövcud qanunsuz forpostların ləğvi istiqamətində addımlar atmaq çağırışı edilir.
Məktubda qeyd edilir ki, ABŞ Prezidenti Donald Tramp və dövlət katibi Marko Rubio da daha əvvəl İordan çayının qərb sahilində zorakılığa və ərazinin ilhaqına yönəlmiş addımlara qarşı olduqlarını bildiriblər. Senatorların fikrincə, bu narahatlıqlara İsrail hökuməti tərəfindən yetərli cavab verilməyib.
İsrail hökuməti məskunlaşanların zorakılığını rəsmi dövlət siyasəti kimi dəstəklədiyini rədd edir. Bununla belə, İsrail və beynəlxalq hüquq müdafiə təşkilatları hüquq-mühafizə orqanlarının belə halları effektiv araşdırmadığını bildirirlər.
“Amnesty International” İsrailin “Yesh Din” hüquq müdafiə təşkilatının məlumatlarına istinadən bildirir ki, 2005–2025-ci illərdə israilli mülki şəxslərin fələstinlilərə qarşı törətdiyi hüquq pozuntuları üzrə izlənilən polis araşdırmalarının təxminən 94 faizi ittiham irəli sürülmədən bağlanıb, yalnız təxminən 3 faizi qismən və ya tam məhkumluqla nəticələnib.
BMT-nin Humanitar Məsələlərin Əlaqələndirilməsi Ofisinin məlumatlarına görə, məskunlaşanların fələstinlilərə qarşı hücumlarının sayı son illərdə kəskin artıb. “Amnesty International”ın həmin statistikaya əsaslanan hesabatında 2026-cı ilin ilk üç ayında gündə orta hesabla altı belə hücumun qeydə alındığı bildirilir.
