MSNews.az xəbər verir ki, ABŞ Mərkəzi Komandanlığının — “CENTCOM”un məlumatına əsasən, hadisə iyulun 15-də Fars körfəzinin beynəlxalq sularında baş verib. Hücuma məruz qalan gəminin Kurasao bayrağı altında üzən “M/T Belma” tankeri olduğu bildirilib.
CENTCOM-un iddiasına görə, yük daşımayan tanker İranın Xark adasına doğru hərəkət edərkən ABŞ qüvvələrinin çoxsaylı xəbərdarlıqlarına məhəl qoymayıb və İran limanlarına tətbiq edilən dəniz blokadasını pozmağa çalışıb.
Bundan sonra ABŞ hərbi təyyarəsi gəminin tüstü bacasına “Hellfire” raketləri atıb. CENTCOM zərbədən sonra tankerin İran istiqamətində hərəkətini dayandırdığını açıqlayıb. Hadisə nəticəsində ekipaj üzvləri arasında itki və ya xəsarət olub-olmadığı barədə məlumat verilməyib.
“Reuters” də tankerin boş olduğunu və Xark adasına doğru hərəkət etdiyini bildirib. Agentliyin məlumatına görə, ABŞ blokadanı yenidən tətbiq etdikdən sonra iki digər kommersiya gəmisinin istiqaməti dəyişdirilib, “M/T Belma” isə sıradan çıxarılıb.
“Associated Press” hadisəni ABŞ ilə İran arasında Hörmüz boğazına nəzarət uğrunda gərginliyin artmasının növbəti mərhələsi kimi qiymətləndirib. Tankerin vurulması ilə bağlı məlumat hələlik İran rəsmiləri və gəmi operatoru tərəfindən ayrıca təsdiqlənməyib.
ABŞ İran limanlarına gedən və bu limanlardan çıxan gəmilərə qarşı dəniz blokadasını iyulun 14-də yenidən tətbiq etdiyini açıqlamışdı. CENTCOM ilk 24 saat ərzində iki gəminin xəbərdarlıqlara əməl edərək marşrutunu dəyişdirdiyini bildirib.
