ABŞ hökuməti Prezident Donald Tramp dövründə tətbiq edilmiş və daha sonra ABŞ Ali Məhkəməsi tərəfindən qanunsuz sayılmış tariflər üzrə geri ödəniş prosesinə start verib. 20 aprel tarixindən etibarən şirkətlər ABŞ Gömrük və Sərhəd Mühafizəsi Xidmətinin (CBP) yaratdığı yeni elektron sistem vasitəsilə kompensasiya üçün müraciət edə bilərlər.
Məlumatı “Reuters”-ə istinadən MSNews.az verir.
Məhkəmə fevral ayında qərara alıb ki, Tramp administrasiyası bu tarifləri tətbiq edərkən 1977-ci il fövqəladə səlahiyyətlər qanunundan düzgün istifadə etməyib və idxal rüsumlarını müəyyən etmək səlahiyyəti Konqresə məxsusdur. Bu qərardan sonra hökumət idxalçılara ödənilmiş məbləğlərin qaytarılması üçün xüsusi mexanizm hazırlayıb.
Rəsmi sənədlərə görə, ümumilikdə 330 mindən çox idxalçı 53 milyon göndəriş üzrə bu tarifləri ödəyib. Geri qaytarılacaq ümumi məbləğin 166 milyard dollara çata biləcəyi bildirilir. Aprelin əvvəlində artıq 56 mindən çox şirkət elektron qeydiyyatı tamamlayaraq ilkin mərhələdə 127 milyard dollarlıq geri ödəniş üçün uyğun hesab olunub.
Gömrük xidməti təsdiqlənmiş müraciətlər üzrə vəsaitin, faizlər də daxil olmaqla, 60-90 gün ərzində ödəniləcəyini açıqlayıb. Bununla belə, daha mürəkkəb işlərdə proses daha uzun çəkə bilər. İlk mərhələdə yaxın dövrdə rəsmiləşdirilmiş və ya yekunlaşmamış idxal əməliyyatlarına üstünlük veriləcək.
Ekspertlər qeyd edirlər ki, geri ödənişlər əsasən tarifləri birbaşa ödəyən şirkətlərə veriləcək. Son istehlakçılara əlavə ödənişlərin qaytarılması ilə bağlı isə hazırda hüquqi mexanizm nəzərdə tutulmur.
