Marketlərdə asanlıqla tapa biləcəyimiz bildirçin yumurtası, qida dəyərinə görə toyuq yumurtasından daha zəngin hesab olunur. Vitamin və minerallar baxımından yüksək tərkibə malik olan bu yumurta, ölçüsünə nisbətən olduqca faydalıdır. Belə ki, bildirçin yumurtasında toyuq yumurtası ilə müqayisədə təxminən 4 dəfə çox fosfor, 8 dəfə çox dəmir, 10 dəfə çox protein, 15 dəfə çox B2 vitamini və 6 dəfə çox B1 vitamini mövcuddur. Ölçü baxımından isə 4 bildirçin yumurtası bir toyuq yumurtasına bərabərdir.
Bildirçin yumurtası toyuq yumurtasından dörd dəfə kiçik olmasına baxmayaraq, sağlamlığa verdiyi faydalar qat-qat çoxdur. Xüsusilə nəfəs darlığı, bronxit, astma, öskürək və qaraciyər xəstəliklərinin müalicəsində xeyirli olduğu bildirilir.
Bildirçin yumurtası A və B2 vitaminləri sayəsində orqanizmin gündəlik vitamin ehtiyacının böyük bir hissəsini qarşılayır. Tərkibində yüksək miqdarda protein və amin turşuları olduğu üçün hüceyrələrin yenilənməsinə və əzələ inkişafına kömək edir. Uşaqların və gənclərin fiziki və zehni inkişafına müsbət təsir göstərir.
Astma, öskürək, allergiya və bronxit kimi tənəffüs yolu xəstəliklərinin müalicəsində faydalı hesab olunur. D vitamini ilə zəngin olduğu üçün sümüklərin möhkəmlənməsinə kömək edir və sümük kövrəkliyinin qarşısını alır. Sinir sistemini gücləndirir, stressi azaldır və miqren ağrılarını yüngülləşdirə bilər.
Ürək əzələlərini möhkəmləndirir, qan dövranını tənzimləyir və təzyiqin normallaşmasına kömək edir. Qan azlığının qarşısını alır, həzmi asanlaşdırır və mədə-bağırsaq problemləri, xüsusilə xora və qastrit zamanı müalicəvi təsir göstərə bilər. Böyrək daşlarının düşməsini asanlaşdırdığı, həmçinin piylənməyə qarşı faydalı olduğu qeyd olunur.
Bildirçin yumurtası immun sistemini gücləndirir, toksinlərin bədəndən atılmasına kömək edir və xərçənglə mübarizədə dəstəkləyici qida kimi tövsiyə olunur. Dəri problemləri, o cümlədən ekzema zamanı müsbət təsir göstərə bilər. Saçlara parlaqlıq, dəriyə isə daha sağlam və parlaq görünüş qazandırır. Bundan əlavə, cinsi istəyi və performansı artırdığı da bildirilir.
Bildirçin yumurtası əsasən çiy halda istifadə olunur. Bunun üçün bir stəkana 1 ədəd bildirçin yumurtası qırılır, üzərinə süd əlavə edilir və 1 çay qaşığı bal qatılaraq qarışdırılır. Bu qarışım səhər acqarına içilə bilər.
Astma, öskürək, nəfəs darlığı və allergiya zamanı 1 ədəd bildirçin yumurtası bir stəkana qırılır, üzərinə 1 xörək qaşığı bal və bir qədər süd əlavə edilir. Qarışım 10 dəqiqə gözlədikdən sonra içilir. Bu prosedur 15 gün davam etdirilir, daha sonra ayda 3–4 dəfə təkrar edilə bilər. Bildirçin yumurtası eyni zamanda toyuq yumurtası kimi müxtəlif yeməklərdə bişirilərək də istifadə oluna bilər.
Bildirçin yumurtası bəzi hallarda körpələr üçün ağır ola bilər və böyrəklərə mənfi təsir göstərə bilər. Bu səbəbdən körpələrdə istifadəsi tövsiyə edilmir. Ürək xəstəliyi olan şəxslər, əvvəllər insult keçirmiş insanlar və xolesterin səviyyəsi yüksək olanlar bildirçin yumurtasından istifadə etməzdən əvvəl mütləq həkimlə məsləhətləşməlidirlər.
