Rusiyalı milyarderlər Putindən sonrakı dövrə hazırlaşırlar

BBC-nin araşdırmasına görə, Rusiyanın bir sıra milyarderləri Vladimir Putindən sonrakı siyasi sistemi müzakirə etməyə başlayıblar. Onların bir hissəsi 1990-cı illərdə olduğu kimi yenidən siyasi təsir imkanları qazanmağa ümid edir.

52

Rusiyanın ən varlı iş adamlarının bir hissəsi Prezident Vladimir Putindən sonrakı dövrdə ölkənin siyasi sisteminin necə formalaşacağını müzakirə etməyə başlayıb. Onların arasında 1990-cı illərdə olduğu kimi yenidən siyasi qərarlara təsir göstərmək istəyənlər var. Bununla belə, milyarderlər mövcud hakimiyyətə açıq şəkildə qarşı çıxmaqdan çəkinirlər.

MSNews.az xəbər verir ki, bu barədə noyabrın 16-da BBC Rusiyanın biznes elitasının mövqeyinə dair araşdırma dərc edib. Materialda varlı iş adamları ilə əlaqələri olan jurnalist və ekspertlərin qiymətləndirmələrinə yer verilib.

Araşdırmaya əsasən, rusiyalı iri biznes nümayəndələrinin bir hissəsi Ukraynaya qarşı müharibənin ölkəni siyasi və iqtisadi çıxılmaz vəziyyətə saldığını düşünür.

Onlar Putinin hakimiyyətdə olduğu müddətdə ciddi dəyişikliklər gözləməsələr də, gələcəkdə biznes dairələrinin dövlət idarəçiliyinə təsir imkanlarının genişlənəcəyinə ümid edirlər.

Britaniyanın The Economist jurnalının redaktoru Arkadi Ostrovskinin sözlərinə görə, bəzi milyarderlər Rusiyanın yenidən 1990-cı illərdəki oliqarxik idarəçilik modelinə bənzər sistemə qayıtmasını istəyirlər.

Həmin dövrdə Rusiyanın böyük biznes qrupları siyasi qərarlara, hökumətin formalaşmasına və dövlət siyasətinə əhəmiyyətli təsir göstərə bilirdilər.

Rusiya elitasını araşdıran ekspert Aleksandra Prokopenko bildirib ki, bəzi iş adamlarının Vladimir Putinə münasibəti hətta onların qeyri-rəsmi söhbətlərində istifadə etdiyi ifadələrdə də dəyişib.

Onun sözlərinə görə, milyarderlər əvvəllər Putini hörmət əlaməti olaraq “rəis”, “birinci” və ya “VV” adlandırırdılarsa, indi bəziləri onun haqqında “baba” ifadəsini istehzalı və mənfi çalarla işlədirlər.

Prokopenko hesab edir ki, bu dəyişiklik biznes elitasının müəyyən hissəsində mövcud siyasi vəziyyətdən narazılığın artdığını göstərir.

Ekspertin müşahidələrinə görə, bəzi sahibkarlar Rusiyada repressiyaların azalmasını, söz azadlığının genişlənməsini və siyasi partiyalar arasında daha açıq rəqabətin yaranmasını istəyirlər.

BBC qeyd edir ki, Putin hakimiyyətə gəldikdən sonra Rusiyada iri biznesin siyasi qərarlara təsiri tədricən məhdudlaşdırılıb.

Bu prosesin ən tanınmış nümunələrindən biri keçmiş neft maqnatı Mixail Xodorkovskinin 2003-cü ildə həbsidir. Həmin hadisə biznes elitasına hakimiyyətlə açıq qarşıdurmanın mümkün nəticələrini göstərən nümunə kimi qiymətləndirilir.

Prokopenko danışdığı milyarderlərdən birinin telefonunun dinlənilməsindən qorxaraq qeyri-adi ehtiyat tədbirləri gördüyünü bildirib.

Ekspert həmin şəxsin davranışını Rusiyanın biznes dairələrində mövcud qorxu mühitinin göstəricisi kimi təqdim edib.

BBC-nin araşdırmasında Rusiyanın ən varlı sahibkarlarından biri, “EuroChem” və SUEK şirkətlərinin təsisçisi Andrey Melniçenkonun “The Economist” jurnalına müsahibəsi də diqqət mərkəzindədir.

Melniçenko müsahibəsində Rusiyada təkşəxsli idarəçiliyin dəyişməsinin və ölkənin dünya ilə əlaqələrinin genişləndirilməsinin vacibliyini vurğulayıb.

O, Putinin hakimiyyətdən getməsini açıq tələb etməsə də, ölkənin idarəçilik sistemində dəyişikliklərin zəruriliyindən danışıb.

Prokopenkonun fikrincə, bu müsahibə digər varlı iş adamlarını da ictimai müzakirələrə qoşulmağa təşviq etmək cəhdi olub. Lakin digər milyarderlər Melniçenkonun mövqeyini açıq şəkildə dəstəkləməyiblər.

BBC-nin müraciət etdiyi ekspertlər hakimiyyət dəyişikliyindən sonra Rusiyada müxtəlif siyasi modellərin yarana biləcəyini nəzərdən keçirirlər. Bunlara daha açıq siyasi sistem, mövcud avtoritar idarəçiliyin davamı və yaxud iri biznes qruplarının yenidən gücləndiyi oliqarxik model daxildir.

Bununla belə, hazırda Rusiya milyarderlərinin hakimiyyət dəyişikliyi üçün təşkilatlanmış siyasi fəaliyyətə başladığına dair təsdiqlənmiş məlumat yoxdur. Araşdırma daha çox biznes elitasının bir hissəsindəki əhvali-ruhiyyəni və gələcəklə bağlı gözləntiləri əks etdirir.

Noyabr 2026
BE ÇA Ç CA C Ş B
 1
2345678
9101112131415
16171819202122
23242526272829
30  

Bu gün üçün yayımlanmış xəbər tapılmadı.