İsveçrədə ölkə əhalisinin 10 milyon nəfərlə məhdudlaşdırılması təklifi referendumda rədd edilib.
MSNews.az xəbər verir ki, iyunun 14-də keçirilən ümumxalq səsverməsində seçicilərin 54,79 faizi təşəbbüsün əleyhinə, 45,21 faizi isə lehinə səs verib. Səsvermədə iştirak səviyyəsi 58,86 faiz təşkil edib.
Təşəbbüs İsveçrə Xalq Partiyası tərəfindən irəli sürülmüşdü. Təklifə əsasən, ölkənin daimi əhalisi 2050-ci ilə qədər 10 milyon nəfəri keçməməli idi.
Layihədə əhali sayı 9,5 milyona çatdığı halda hökumətin miqrasiyanın məhdudlaşdırılması üçün əlavə tədbirlər görməsi nəzərdə tutulurdu. Əhali 10 milyon həddini keçəcəyi təqdirdə isə İsveçrənin Avropa İttifaqı ilə sərbəst hərəkət razılaşmasından çıxması gündəmə gələ bilərdi.
“The Guardian” yazır ki, təşəbbüs qəbul olunsaydı, bu, yaşayış icazələri, ailə birləşməsi və sığınacaq qaydalarının sərtləşdirilməsinə səbəb ola bilərdi.
“Reuters”in məlumatına görə, İsveçrə hökuməti və biznes dairələri təşəbbüsə qarşı çıxırdı. Onlar hesab edirdilər ki, əhali limiti ölkənin Avropa İttifaqı ilə münasibətlərinə, əmək bazarına və iqtisadi sabitliyinə mənfi təsir göstərə bilər.
Hazırda İsveçrənin əhalisi təxminən 9,1 milyon nəfərdir. Rəsmi proqnozlara görə, ölkə əhalisinin 10 milyon həddinə 2040-cı illərin əvvəllərində çatacağı gözlənilir.
Beləliklə, referendum nəticəsində İsveçrə əhalinin qanuni yolla 10 milyon nəfərlə məhdudlaşdırılması ideyasını qəbul etməyib.
