ABŞ Prezidenti Donald Tramp Böyük Britaniyada RAF Fairford aviabazası yaxınlığında terror aktı hazırlamaqda şübhəli bilinərək saxlanılan beş nəfərin girov müqabilində azad edilməsini sərt tənqid edib. Britaniya polisi isə şübhəlilərin azad edilməsinin istintaqın başa çatması demək olmadığını və onların ciddi məhdudiyyətlər altında qaldığını bildirir.
MSNews.az xəbər verir ki, jurnalistlərin aviabazada baş verən insidentlə bağlı sualını cavablandıran Tramp saxlanılan şəxsləri “terrorçular” adlandıraraq Britaniya hakimiyyətinin qərarından məyus olduğunu deyib.
“Sadəcə məyus oldum ki, onlar terrorçuları tutdular, yaxşı iş gördülər, sonra isə, demək olar, sərbəst buraxdılar. Terrorçuya necə girov verə bilərsiniz? Mən bunu anlamıram”, — Tramp bildirib.
Söhbət İngiltərənin Qlosterşir qraflığında yerləşən və ABŞ Hərbi Hava Qüvvələrinin də istifadə etdiyi RAF Fairford aviabazasının yaxınlığında baş vermiş insidentdən gedir.
“Reuters” xəbər verir ki, sentyabrın 27-də səhər saatlarında ərazidə üç şübhəli mikroavtobus və maskalı şəxslər barədə polisə məlumat daxil olub. Hadisə yerinə silahlı polis qüvvələri göndərilib və Londondan olan 23–25 yaşlı beş Britaniya vətəndaşı saxlanılıb. Onlar əvvəlcə partlayıcı maddələrlə bağlı cinayətlərdə, daha sonra isə terror aktı hazırlamaqda şübhəli biliniblər.
Britaniya terrorla mübarizə polisi avtomobillərin geniş ekspertizasından sonra orada müəyyən miqdarda benzin tapıldığını, lakin heç bir əldəqayırma partlayıcı qurğunun aşkarlanmadığını açıqlayıb.
Beş şübhəli polis girovu ilə azad edilsə də, onların barəsində istintaq davam edir. Britaniyanın terrorla mübarizə polisinin rəhbəri Lorens Teylor bildirib ki, şəxslərin hərəkətinə və digər insanlarla əlaqələrinə “sərt şərtlər” tətbiq olunub. Onun sözlərinə görə, azad edilmələri işin bağlanması anlamına gəlmir.
Araşdırılan versiyalar arasında xarici dövlətlə mümkün əlaqə də var. ABŞ dövlət katibi Marko Rubio hadisənin arxasında xarici aktorun dayandığını iddia edib, lakin Britaniya istintaqı hələ belə bir əlaqəni təsdiqləməyib. İranla mümkün bağlantı da araşdırılır və Tehran ittihamları rədd edib.
RAF Fairford ABŞ Hərbi Hava Qüvvələrinin Britaniyada istifadə etdiyi strateji obyektlərdən biridir və 2026-cı ildə İrana qarşı ABŞ əməliyyatlarında da istifadə olunub.
