ABŞ Prezidenti Donald Trampın Polşanın müdafiə naziri Vladislav Kosinyak-Kamışa hakim koalisiyadan ayrılaraq millətçi və ifrat sağçı siyasi qüvvələrlə əməkdaşlıq etməyi təklif etdiyi iddia olunur. Polşalı nazir isə bu tövsiyəyə əməl etməyib.
MSNews.az xəbər verir ki, bu barədə amerikalı jurnalist Enn Eplbaum ABŞ-da nəşr olunan “The Atlantic” jurnalında dərc edilmiş məqaləsində yazıb. Müəllifin məlumatına görə, hadisə 2026-cı ilin martında Vaşinqtonda keçirilən qapalı görüş zamanı baş verib.
Nəşrin yazdığına görə, Tramp Polşa Xalq Partiyasının sədri olan Kosinyak-Kamışa Baş nazir Donald Tuskun rəhbərlik etdiyi koalisiyadan ayrılacağı təqdirdə Vaşinqtonda daha əlverişli münasibətlə qarşılaşacağını bildirib.
“The Atlantic” qeyd edir ki, Kosinyak-Kamış bu təklifə əməl etməyərək hakim koalisiyada qalmağa üstünlük verib.
Məsələ daha əvvəl Polşa mediasında da gündəmə gəlib. “Notes from Poland”nəşrinin məlumatına görə, müdafiə naziri martın 2-də Trampla görüşdüyünü təsdiqləsə də, söhbətin məzmununu açıqlamayıb.
Polşanın xarici işlər naziri Radoslav Sikorski isə görüşün ölkənin daxili siyasətinə xarici müdaxilə cəhdi olub-olmadığına dair suallar qaldırıb.
Bununla belə, Polşanın “Rzeczpospolita” nəşri öz mənbələrinə istinadən Trampın koalisiyadan çıxmaq təklifi verməsi barədə məlumatları təkzib edib. Nəşrin yazdığına görə, görüşün əsas mövzusu Polşada daimi ABŞ hərbi bazasının yaradılması olub.
Hazırda Trampın belə bir təklif verdiyi rəsmi şəkildə təsdiqlənməyib. “The Atlantic”ın şərh xarakterli məqaləsi əvvəlki Polşa media xəbərlərinə əsaslanır. Ağ Ev isə jurnalın mövzu ilə bağlı sorğusuna cavab verməyib.
