İran ərəblərini təmsil edən Əhvaz Xalq Demokratik Cəbhəsi Tehranın Azərbaycanın daxili işlərinə müdaxilə etdiyini və dini inanclardan istifadə etməklə ölkədə parçalanma yaratmağa çalışdığını bəyan edib. Təşkilat İran hakimiyyətini bu fəaliyyətə son qoymağa çağıraraq Azərbaycan xalqı və hökuməti ilə həmrəyliyini, ölkənin müstəqilliyinə, suverenliyinə və ərazi bütövlüyünə dəstəyini ifadə edib.
MSNews.az xəbər verir ki, bu barədə Əhvaz Xalq Demokratik Cəbhəsinin oktyabrın 23-də yayıldığı bildirilən bəyanatında qeyd olunub.
Bəyanatda İran hakimiyyətinin dini inanclardan siyasi təsir vasitəsi kimi istifadə etməsi kəskin tənqid olunub. Təşkilatın mövqeyinə görə, bu cür fəaliyyət Azərbaycan cəmiyyətində qarşıdurma yaratmaq və regional sabitliyi zəiflətmək məqsədi daşıyır.
“İran rejiminin Azərbaycan Respublikasının daxili işlərinə müdaxiləsini və dini inanclardan sui-istifadə edərək ölkə xalqı arasında parçalanma yaratmaq cəhdlərini qətiyyətlə pisləyirik”, – deyə açıqlamada vurğulanıb.
Əhvaz Xalq Demokratik Cəbhəsi bəyanatında İranın Yaxın Şərqdəki fəaliyyətinə də toxunub. Təşkilat İraq, Livan və Yəməndə yaşanan hadisələri nümunə göstərərək məzhəb qarşıdurmalarının qızışdırılmasının və silahlı vasitəçi qüvvələrə dəstəyin dövlətlərin suverenliyi üçün təhlükə yaratdığını bildirib.
“İraq, Livan və Yəmənin acı təcrübələri göstərir ki, məzhəb təhrikləri və proksi qüvvələrə dəstək milli suverenliyi və regional təhlükəsizliyi təhdid edir. Azərbaycan Respublikası bu dağıdıcı siyasətlərin təkrarlandığı meydana çevrilməməlidir”, – deyə bəyanatda qeyd edilib.
Təşkilat Tehranı proksi qüvvələrə dəstəyi və qonşu dövlətlərin daxili işlərinə yönəlmiş müdaxilələri dərhal dayandırmağa çağırıb. Bəyanatda Azərbaycanın müstəqilliyinə və ərazi bütövlüyünə xüsusi yer ayrılıb. Əhvaz Xalq Demokratik Cəbhəsi Azərbaycan xalqı və hökuməti ilə həmrəy olduğunu, ölkənin suverenliyinin və daxili siyasi proseslərinin xarici müdaxilələrdən qorunmasını dəstəklədiyini bildirib.
Təşkilatın açıqlamasında qeyd olunub ki, dini inanclar heç bir dövlətə başqa ölkənin daxili işlərinə qarışmaq hüququ vermir.
“Din müdaxilə üçün bəhanə deyil və millətlərin taleyi yalnız xalqların öz iradəsi ilə müəyyənləşdirilir”, – deyə bəyanata yekun vurulub.
Əhvaz Xalq Demokratik Cəbhəsi İranın cənub-qərbində yaşayan ərəb əhalisinin milli və siyasi hüquqlarını müdafiə etdiyini bildirən müxalif təşkilatdır. Təşkilatın rəsmi internet saytında onun fəaliyyətinin ərəb əhalisinin öz müqəddəratını təyinetmə hüququ və siyasi müstəqillik tələbləri ətrafında qurulduğu bildirilir.
Qeyd edək ki, İranın Azərbaycan daxilində dini zəmində parçalanma yaratması və konkret müdaxilələr həyata keçirməsi barədə ittihamlar təşkilatın siyasi mövqeyini əks etdirir. Bu bəyanat həmin iddiaların müstəqil şəkildə sübuta yetirildiyi anlamına gəlmir.
