Rusiya və Ukrayna avqustun 29-dan 30-na keçən gecə qarşılıqlı uzaqmənzilli zərbələr həyata keçirib: Kiyevdə yaşayış və inzibati obyektlər zərər görüb, Ukrayna isə Rusiyanın iri Kiriş neft emalı zavodunu və Yeysk hərbi aerodromunu vurduğunu açıqlayıb.
MSNews.az xəbər verir ki, Ukrayna Fövqəladə Hallar üzrə Dövlət Xidmətinin məlumatına əsasən, Kiyevə PUA hücumu nəticəsində azı üç nəfər yaralanıb. “Ukrinform” bildirir ki, Obolon rayonunda 12 mərtəbəli yaşayış binasının ikinci-beşinci mərtəbələrində yanğın baş verib. Yanğın 80 kvadratmetr sahədə söndürülüb, üç yaralı tibbi briqadalara təhvil verilib.
Podol rayonunda qeyri-yaşayış tikilisinə zərbə dəyib, Qoloseyevsk rayonunda inzibati binada yanğın baş verib. Desnyansk rayonunda isə açıq ərazidə təxminən iki hektarlıq otlaq yanıb. “Kyiv Post” hücumun Rusiya qüvvələrinin Kiyevə ardıcıl üçüncü gün həyata keçirdiyi intensiv PUA zərbələrinin davamı olduğunu yazır.
Eyni gecə Ukrayna qüvvələri Rusiya ərazisində bir sıra strateji obyektlərə zərbə endirib. Ukrayna Baş Qərargahı Leninqrad vilayətindəki Kiriş neft emalı zavodunun və Krasnodar diyarındakı Yeysk hərbi aerodromunun vurulduğunu təsdiqləyib. “Ukrinform” məlumatına görə, Kirişdə zərbədən sonra zavod ərazisində yanğın qeydə alınıb.
Leninqrad vilayətinin qubernatoru Aleksandr Drozdenko əvvəlcə region üzərində 42 PUA-nın vurulduğunu bildirsə də, sonradan bu rəqəmi 62-yə yüksəldib. O, Kiriş sənaye zonasında yanğın baş verdiyini də təsdiqləyib. “Ukrainska Pravda” və Rusiya mənbələri hücumun bir neçə saat davam etdiyini bildirir.
Kirişdəki “Kirishinefteorgsintez” — KINEF Rusiyanın ən iri neft emalı müəssisələrindən biridir. “Reuters”-in məlumatına görə, zavodun illik emal gücü təxminən 20 milyon ton, 2024-cü ildə faktiki emal həcmi isə 17,5 milyon ton olub. Bu, Rusiyanın ümumi neft emalının təxminən 6,6%-nə bərabərdir. Zavod mart ayında da Ukrayna PUA-larının hücumundan sonra emalı dayandırmışdı.
Yeysk aerodromuna hücum barədə ilk məlumatlar monitorinq kanalları və yerli sakinlərdən gəlib. “ANSA” aerodrom yaxınlığında güclü partlayışların eşidildiyini yazıb. “Kyiv Post” isə NASA FIRMS peyk məlumatlarında aerodromun uçuş yolları və anbar zonaları yaxınlığında yanğın ocaqlarının göründüyünü bildirir. Rusiya hakimiyyəti aerodroma dəymiş zərərin miqyası barədə hələ ətraflı məlumat açıqlamayıb.
Ukrayna son aylarda Rusiyanın neft emalı və hərbi infrastrukturuna uzaqmənzilli PUA hücumlarını intensivləşdirib. “Reuters”-in məlumatına görə, avqustun sonlarında davam edən zərbələr fonunda Rusiyada benzin istehsalı daxili tələbatın təxminən 70%-nə qədər enib. Moskva isə Ukraynanın enerji və sənaye obyektlərinə qarşı hava hücumlarını davam etdirir.
