Azərbaycanda məktəblərdə “TikTok” sosial şəbəkəsinə giriş məhdudlaşdırılıb. Təhsil müəssisələrində şagirdlərin internet təhlükəsizliyinin təmin edilməsi məqsədilə 200-dən çox zərərli məzmun kateqoriyasına da məhdudiyyət tətbiq olunub.
MSNews.az xəbər verir ki, bunu elm və təhsil nazirinin müavini Firudin Qurbanov oktyabrın 21-də keçirilən “Rəqəmsal dövrdə ailə: transformasiyanın yeni sərhədləri” mövzusunda Ailə Forumunda bildirib.
Nazir müavininin sözlərinə görə, məktəblərdə şagirdlərin internetdən istifadəsi müəyyən təhlükəsizlik qaydaları əsasında tənzimlənir.
“TikTok” platformasına girişin məhdudlaşdırılması ilə yanaşı, cinayət, narkotik vasitələr, zorakılıq və digər təhlükəli mövzularla bağlı məzmunların qarşısının alınması üçün filtrasiya tədbirləri görülüb.
Firudin Qurbanov bildirib ki, uşaqların zərərli informasiyadan qorunması yalnız təhsil müəssisələrinin fəaliyyəti ilə məhdudlaşmamalıdır.
“Həmin görüntülər cinayət, narkotik, şiddət və sair məzmunlar daşıyırdı. Təbii ki, bu məhdudlaşma təkcə məktəblə bitməməlidir. Ailədə də uşaqların bu kimi məzmunlardan və platformalardan uzaq durmasına nəzarət edilməlidir”, – deyə nazir müavini vurğulayıb.
Qərarın əsas məqsədi şagirdlərin internetdə təhlükəsizliyini təmin etmək və onları yaşlarına uyğun olmayan məzmunlardan qorumaqdır.
Nazir müavini daha əvvəl, iyunun 8-də Milli Məclisdə keçirilən komitə iclasında da məktəblərdə “TikTok”a girişin bloklandığını açıqlamışdı.
O zaman Qurbanov bildirib ki, təhsil müəssisələrində şagirdlərin internetə çıxışı filtrlənir, terrorizm, ekstremizm, narkotik vasitələr və digər təhlükəli mövzularla bağlı resurslara giriş məhdudlaşdırılır.
Beləliklə, “TikTok”a giriş məhdudiyyəti yeni tətbiq edilən qərar deyil, daha əvvəl həyata keçirilmiş tədbirin davamıdır.
Nazir müavini sosial şəbəkələrdən istifadənin həm müsbət, həm də mənfi tərəfləri olduğunu da qeyd edib.
Onun sözlərinə görə, rəqəmsal platformalar ünsiyyət, məlumat əldə etmək və özünüifadə üçün imkanlar yaratsa da, onlardan nəzarətsiz istifadə uşaqların təhlükəli məzmunlarla qarşılaşması riskini artırır.
Qeyd edək ki, açıqlama məktəblərdə internetə çıxışın məhdudlaşdırılmasına aiddir. “TikTok”un bütün Azərbaycan ərazisində qadağan edilməsi barədə qərar elan olunmayıb.
Məhdudiyyətlərin tətbiqinə dair əlavə texniki detallar isə açıqlanmayıb.
