Şimali Koreya lideri Kim Çen Inın bacısı Kim Yo Conq Cənubi Koreya ilə sərhəddə vəziyyətin son dərəcə qeyri-sabit olduğunu bəyan edib. O, Pxenyanın sərhəd boyunca əlavə hərbi vasitələr yerləşdirməyi və Cənubi Koreyaya qarşı səsgücləndiricilər vasitəsilə təbliğat yayımlarını bərpa etməyi nəzərdən keçirdiyini açıqlayıb.
MSNews.az xəbər verir ki, Kim Yo Conq bu barədə oktyabrın 19-da Koreya Mərkəzi Xəbər Agentliyi (KCNA) vasitəsilə yayımlanan bəyanatında bildirib.
Şimali Koreya rəsmisinin sözlərinə görə, Koreya yarımadasının cənub sərhədində vəziyyət ciddi şəkildə gərginləşib.
“Hazırda cənub sərhədində vəziyyət son dərəcə qeyri-sabitdir. Cənubi Koreya hərbçilərinin məsuliyyətsiz davranışları səbəbindən sərhəddə təhlükəli vəziyyət yaranıb”, – deyə Kim Yo Conq bildirib.
O, Cənubi Koreya hərbçilərini Şimali Koreya əsgərlərinə qarşı təxribat xarakterli hərəkətlər etməkdə ittiham edib.
Bəyanata əsasən, Pxenyan xüsusilə sərhəd istehkamlarının tikintisi ilə məşğul olan hərbçilərinə qarşı xəbərdarlıq atəşlərinin açılmasından və səsgücləndiricilər vasitəsilə edilən xəbərdarlıqlardan narazıdır.
Kim Yo Conq bildirib ki, Şimali Koreya ordusu mümkün qarşıdurmaya hazırlaşmaq üçün sərhəd bölgələrində əlavə taktiki zərbə vasitələrinin yerləşdirilməsini müzakirə edir.
Bundan başqa, ölkə rəhbərliyi Cənubi Koreyaya yönəlmiş səsgücləndirici yayımların yenidən işə salınması imkanını nəzərdən keçirir.
Şimali Koreya tərəfinin iddiasına görə, avqustun 1-dən oktyabrın 17-dək Cənubi Koreya hərbçiləri sərhəddə 2 870 dəfə səsgücləndirici xəbərdarlığı edib və 201 dəfə xəbərdarlıq atəşi açıblar.
Kim Yo Conq bu hərəkətləri hərbi gərginliyi artıran addımlar kimi qiymətləndirib. Gərginliyin əsas səbəblərindən biri iki ölkə arasındakı hərbi demarkasiya xətti boyunca aparılan istehkam işləridir.
Şimali Koreya son illərdə sərhəddə əlavə hasarlar, müdafiə qurğuları və mina sahələri yaradıb. Cənubi Koreya hərbçiləri isə Şimali Koreya əsgərlərinin demarkasiya xəttini keçməsi hallarında xəbərdarlıq tədbirləri gördüklərini bildirirlər.
Seul Pxenyanın ittihamlarını rədd edir və sərhəddəki hərbi tədbirlərinin təhlükəsizliyin qorunması məqsədi daşıdığını vurğulayır.
Cənubi Koreyanın hərbi rəhbərliyi Şimali Koreyanı əlavə silah sistemləri yerləşdirməklə və təbliğat yayımlarını bərpa etməklə vəziyyəti daha da gərginləşdirməməyə çağırıb. İki ölkə arasında münasibətlər son illərdə ciddi şəkildə pisləşib. Səsgücləndirici yayımlar isə uzun müddətdir qarşılıqlı psixoloji təzyiq vasitəsi kimi istifadə olunur.
Bu yayımlarda siyasi mesajlar, xəbərlər və qarşı tərəfin rəhbərliyini tənqid edən materiallar səsləndirilir.
Qeyd edək ki, Şimali Koreya səsgücləndirici yayımları hələ bərpa etməyib. Hazırda bu addım və sərhədə əlavə hərbi vasitələrin yerləşdirilməsi mümkün cavab tədbirləri kimi nəzərdən keçirilir.
