Azərbaycan Xarici İşlər Nazirliyi Gürcüstan Patriarxlığının Qax rayonu ərazisində yerləşən Kürmük məbədi ilə bağlı son bəyanatına etiraz edib. Nazirlik Azərbaycanın ərazisində yerləşən coğrafi və tarixi toponimlərin başqa adlarla təqdim edilməsini qəbuledilməz adlandırıb.
MSNews.az xəbər verir ki, XİN Gürcüstan Patriarxlığının yanaşmasını Azərbaycanın ərazi bütövlüyü və suverenliyinə münasibətdə ərazi iddiaları ehtiva edən mövqe kimi qiymətləndirib və bunun iki ölkə arasındakı strateji tərəfdaşlıq münasibətlərinin ruhuna uyğun olmadığını bildirib.
Azərbaycan tərəfi dini qurumları iki xalq arasında tarixən formalaşmış dostluq və mehriban qonşuluq münasibətlərinə xələl gətirə biləcək ifadə və yanaşmalardan çəkinməyə çağırıb.
XİN-in mövqeyinə görə, Azərbaycan ərazisində yerləşən bütün tarixi, mədəni və dini abidələr Azərbaycan xalqının və dövlətinin milli irsinin ayrılmaz hissəsidir.
Məsələ Gürcüstan Patriarxlığının sentyabrın 24-də yaydığı bəyanatdan sonra gündəmə gəlib. Patriarxlıq Qax rayonundakı Kürmük məbədində və onun ətrafında aparıldığı bildirilən işlərdən narahatlığını ifadə edib. Gürcüstan tərəfi məbədi “tarixi Heretidə” yerləşən və Gürcüstanın “tarixi və mənəvi irsi” üçün əhəmiyyət daşıyan abidə kimi təqdim edib. Gürcüstanın “1TV” telekanalının yaydığı bəyanatda Patriarxlıq məbədin hazırda Azərbaycan Respublikasının ərazisində yerləşdiyini də açıq şəkildə qeyd edib.
Patriarxlıq həmçinin aparılan işlərin məqsədi və xarakteri barədə Azərbaycan dövlət qurumlarından məlumat almadığını bildirib, Gürcüstanın aidiyyəti dövlət qurumlarını məsələ ilə maraqlanmağa və gürcü mütəxəssislərin müzakirələrə cəlb olunmasına şərait yaratmağa çağırıb.
Kürmük məbədi Azərbaycanın Qax rayonu ərazisində yerləşir və ölkənin rəsmi tarixi-mədəni irs siyahılarında qorunan abidələr sırasında göstərilir. Azərbaycan Prezidentinin rəsmi sənədlərində də Qax rayonundakı “Kürmük” məbədində bərpa-konservasiya işlərinin aparıldığı qeyd olunub.
Azərbaycan mənbələrində abidə Qafqaz Albaniyası dövrünün irsi ilə əlaqələndirilir. Bakı Beynəlxalq Multikulturalizm Mərkəzinin materiallarında hazırkı tikilinin daha qədim dini məbədin yerləşdiyi ərazidə formalaşdığı və məkanın həm xristianlar, həm də müsəlmanlar tərəfindən ziyarət edildiyi bildirilir.
Beləliklə, hazırkı fikir ayrılığı məbədin hansı dövlətin ərazisində yerləşməsi ilə bağlı deyil — Gürcüstan Patriarxlığı da onun Azərbaycan ərazisində olduğunu bildirir. Mübahisə əsasən abidənin tarixi-mədəni mənsubiyyətinin necə təqdim edilməsi və orada aparılan işlərdə Gürcüstan tərəfinin iştirak edib-etməməsi ətrafındadır.
