Efiopiyanın şimalındakı Tiqray regionunda federal hakimiyyətlə Tiqray Xalq Azadlıq Cəbhəsi (TPLF) arasında gərginlik yenidən silahlı qarşıdurmaya çevrilib. Yerli və təhlükəsizlik mənbələri TPLF qüvvələrinin regionun paytaxtı Mekele şəhərində yerləşən Alula Aba Neqa hava limanına nəzarəti ələ keçirdiyini bildirirlər.
MSNews.az xəbər verir ki, “Anadolu Agentliyi”nin məlumatına görə, hava limanının statusu ilə bağlı Efiopiya federal hökuməti və TPLF tərəfindən ilkin mərhələdə rəsmi açıqlama verilməyib. Buna görə hava limanının ələ keçirilməsi barədə məlumat yerli mənbələrə əsaslanır.
“Euronews” hava limanı əməkdaşlarından birinə istinadən bildirib ki, işçilərə əraziyə getməmək və evlərinə qayıtmaq göstərişi verilib. Mənbənin sözlərinə görə, uçuşlar dayandırıldıqdan sonra hava limanında fəaliyyət faktiki olaraq dayanıb.
“Ethiopian Airlines” sentyabrın 23-dən Mekele, Aksum və Şire şəhərlərinə uçuşları “Tiqray regionundakı mövcud vəziyyət” səbəbilə müvəqqəti dayandırdığını açıqlayıb. Aviaşirkət reyslərin nə vaxt bərpa ediləcəyinin daha sonra elan olunacağını bildirib.
Gərginlik yalnız Tiqrayla məhdudlaşmır. Mənbələr TPLF qüvvələri ilə federal ordu arasında qonşu Afar regionunun Abala və Erebti ərazilərində də döyüşlərin başladığını bildirirlər.
Son eskalasiya TPLF-nin də daxil olduğu yeddi silahlı qrupun Efiopiya Baş naziri Abiy Əhmədin hökumətinə qarşı yeni ittifaq yaratmasından bir neçə gün sonra baş verib. “Reuters”in məlumatına görə, müxtəlif etnik və siyasi qüvvələri birləşdirən ittifaq federal hökuməti hakimiyyəti həddindən artıq mərkəzləşdirməkdə ittiham edir.
Efiopiya hökuməti ilə TPLF arasında 2020–2022-ci illərdə davam edən ağır müharibəyə Afrika İttifaqının vasitəçiliyi ilə imzalanmış Pretoria sazişi son qoymuşdu. Son döyüşlər isə həmin razılaşmanın gələcəyi və ölkənin yenidən genişmiqyaslı münaqişəyə sürüklənməsi ilə bağlı ciddi narahatlıq yaradıb.
