Rusiyada parlament seçkilərinin ikinci günündə elektron səsvermə sistemlərinə və rabitə xətlərinə kiberhücumlar qeydə alındığı bildirilib. Rusiya rəsmilərinin sözlərinə görə, hücumlar ölkənin müxtəlif bölgələrini əhatə etsə də, onların qarşısı alınıb və səsvermə prosesi davam edir.
MSNews.az xəbər verir ki, bu barədə “Reuters” agentliyi Rusiya rəsmilərinə istinadən məlumat yayıb.
Sentyabrın 19-da Moskvanın elektron səsvermə sisteminin gecə saatlarında güclü kiberhücuma məruz qaldığı açıqlanıb. Rusiya Mərkəzi Seçki Komissiyasının sədri Ella Pamfilova hücumların davam etdiyini, lakin bütün müdaxilə cəhdlərinin uğurla dəf olunduğunu bildirib. Onun sözlərinə görə, vəziyyət nəzarət altındadır.
Rusiyanın Rəqəmsal İnkişaf Nazirliyi isə ölkənin Uzaq Şərq bölgəsində rabitə xətlərinə qarşı diversiya cəhdinin qeydə alındığını açıqlayıb. Nazirlik müdaxilənin qarşısının alındığını və rabitə əlaqəsinin tam bərpa edildiyini bildirib.
Rusiya Prezidenti Vladimir Putin daha əvvəl Ukraynanı parlament seçkilərinə müdaxilə etməyə çalışmaqda ittiham edib. Bununla belə, Moskva bu iddianı təsdiqləyən sübutlar təqdim etməyib. Kiberhücumların arxasında kimin dayandığı barədə də təsdiqlənmiş məlumat yoxdur.
Qeyd edək ki, Rusiyada Dövlət Dumasına seçkilər sentyabrın 18–20-də keçirilir. Bu, Rusiyanın 2022-ci ilin fevralında Ukraynaya qarşı genişmiqyaslı hərbi əməliyyatlara başlamasından sonra ölkədə keçirilən ilk parlament seçkiləridir.
Seçkilər 450 deputat yerinin bölüşdürülməsini nəzərdə tutur. Deputatların yarısı partiya siyahıları, digər yarısı isə birmandatlı seçki dairələri üzrə müəyyənləşdirilir.
Müharibəyə qarşı mövqeyi ilə tanınan müxalif “Yabloko” partiyası məhkəmə qərarı ilə partiya siyahısı üzrə seçkilərdən kənarlaşdırılıb. Partiya qərarın əsaslandırılmasını qəbul etməsə də, onun bəzi namizədləri birmandatlı dairələrdə mübarizəni davam etdirirlər.
Mərkəzi Seçki Komissiyasının məlumatına əsasən, sentyabrın 19-da Moskva vaxtı ilə saat 14:00-a olan vəziyyətə görə, ölkə üzrə seçici fəallığı 32,58 faiz təşkil edib.
