Rebekka Afolabi “Universal Woman 2026” beynəlxalq gözəllik müsabiqəsində Böyük Britaniyanı təmsil edəcək.
MSNews.az xəbər verir ki, Afolabi Böyük Britaniya üzrə milli seçim mərhələsinin qalibidir. “Universal Woman Great Britain”-in rəsmi məlumatına görə, final 19 iyul 2025-ci ildə İngiltərənin Çorli şəhərindəki “Park Hall Hotel”-də keçirilib.
Finalda Rebekka Afolabi birinci yeri tutaraq “Universal Woman Great Britain 2025/26″ titulunu qazanıb. Marion Edvards birinci, Telma Smit isə ikinci vitse-miss olub. Afolabi eyni zamanda “Miss Elegance” xüsusi mükafatına layiq görülüb.
Milli müsabiqənin rəsmi səhifəsində bildirilir ki, qələbə Afolabiyə “Universal Woman” beynəlxalq finalında Böyük Britaniyanı təmsil etmək hüququ verib. O, hazırda rəqəmsal marketinq sahəsində proqrammatik menecer kimi çalışır və xeyriyyə fəaliyyəti ilə də məşğuldur. “Universal Woman Great Britain” onun yaratdığı “The Queen Becca Foundation” vasitəsilə London və Nigeriyada qızlara gigiyena vasitələri çatdırıldığını və Nigeriyada üç məktəbli qızın təhsilinə dəstək verildiyini bildirir.
“Universal Woman” təşkilatının rəsmi saytında 2026-cı il beynəlxalq müsabiqəsinin Kambocada keçiriləcəyi açıqlanıb.
“Universal Woman” özünü qadınların müxtəlifliyini, sosial fəaliyyətini və ictimai təsirini ön plana çıxaran beynəlxalq müsabiqə kimi təqdim edir. 2026-cı il buraxılışında müxtəlif ölkə və ərazilərdən iştirakçıların yarışacağı gözlənilir.
