Macarıstanın Kənd Təsərrüfatı Nazirliyi Böyük Britaniya kralı III Karlın sərəncamında olan iki lipitsan atı ilə bağlı müqavilənin ləğvini istəyib, lakin daha sonra bunun yanlış ifadə olunmuş inzibati məktub nəticəsində baş verdiyini açıqlayıb. “Nelson” və “Iveko” adlı atlar əvvəlcədən nəzərdə tutulduğu kimi Britaniyada qalacaq.
MSNews.az xəbər verir ki, məsələ III Karlın tacqoyma mərasimi münasibətilə seçilmiş iki macar atı ətrafında yaranıb. Macarıstan hökuməti bildirir ki, atlar əvvəlcə dövlət hədiyyəsinin bir hissəsi kimi nəzərdə tutulsa da, 2024-cü ildə Britaniyanın “Royal Mews” kral tövlələrinə borc müqaviləsi əsasında, sınaq məqsədilə göndərilib. Buna görə onların hüquqi mülkiyyəti Macarıstan dövlətində qalıb.
İyul ayında Macarıstanın Kənd Təsərrüfatı Nazirliyi həmin borc müqaviləsinin ləğv edilməsini nəzərdə tutan məktub hazırlayıb. Nazirliyin sonrakı açıqlamasına görə, sənəddə məqsəd düzgün ifadə olunmayıb və məsələ Britaniya tərəfi ilə qısa müddətdə aydınlaşdırılıb. Budapeşt atları geri aparmaq niyyətində olmadığını bildirib.
Britaniya mediasında isə məsələ əvvəlcə Macarıstanın III Karldan hədiyyə etdiyi atları geri tələb etməsi kimi təqdim olunub. “Yahoo News” vasitəsilə yayımlanan “The Telegraph” materialında Bukingem Sarayına “sərt tonda” məktub göndərildiyi və bunun saray əməkdaşlarında çaşqınlıq yaratdığı bildirilirdi. Sonradan həm Britaniya, həm də Macarıstan tərəfi vəziyyəti inzibati anlaşılmazlıq kimi qiymətləndirib.
Macarıstanın Londondakı səfirliyi də atların “əvvəldən nəzərdə tutulduğu kimi” Britaniyada qalacağını təsdiqləyib. “Index” Macarıstan Xarici İşlər Nazirliyinə istinadən yazır ki, dövlət Nelson və Ivekonu kral tövlələrindən geri götürmək niyyətində deyil.
“Nelson” və “Iveko” 2024-cü ildə Szilvásvárad dövlət atçılıq təsərrüfatından seçilib və həmin ilin iyununda kral tövlələrinə təhvil verilib. Atlar III Karlın 2023-cü ilin mayında keçirilmiş tacqoyma mərasimi ilə bağlı Macarıstanın simvolik hədiyyəsi kimi təqdim olunmuşdu.
