Rusiyanın xarici işlər naziri Sergey Lavrov Almaniyanın Leypsiq/Halle hava limanındakı pilotsuz uçuş aparatı insidentində Moskvanı günahlandırmasını və bunun ardınca qəbul etdiyi qərarları “mahiyyət etibarilə əsl müharibənin başlanğıcı” adlandırıb.
MSNews.az xəbər verir ki, Lavrov “Vesti”yə müsahibəsində Berlinin ittihamlarını rədd edərək insidentin lazımi şəkildə araşdırılmadığını iddia edib. Onun sözlərini “Reuters” və “TASS” yayıb.
Avqustun 4-də Leypsiq/Halle hava limanının təhlükəsizlik zonasında Ukraynaya məxsus yük təyyarələrinin yaxınlığında partlayıcı və detonatorla təchiz edilmiş pilotsuz uçuş aparatı aşkarlanıb. Almaniya hökuməti təhlükəsizlik və kəşfiyyat qurumlarının əldə etdiyi məlumatların Rusiyanın insidentdə iştirakına açıq şəkildə işarə etdiyini bildirib. Moskva isə ittihamları əsassız hesab edərək rədd edib.
Berlin hadisəyə cavab olaraq Rusiyanın Bonndakı Baş Konsulluğunun bağlanacağını, Berlində fəaliyyət göstərən “Rusiya Evi” ilə bağlı razılaşmaya xitam veriləcəyini açıqlayıb və Rusiya səfirini Xarici İşlər Nazirliyinə çağırıb. “Deutschlandfunk”
Lavrov bu qərarları İkinci Dünya müharibəsi ərəfəsində diplomatik nümayəndəliklərin bağlanması ilə müqayisə edib. O, həmçinin kansler Fridrix Mertsin Almaniyanın Avropanın aparıcı hərbi gücünə çevrilməsi istiqamətindəki siyasətini tənqid edərək bunun Rusiya üçün təhlükəli siqnal olduğunu bildirib.
“Merzin Almaniyanı yenidən Avropanın aparıcı hərbi gücünə çevirmək barədə bütün bu bəyanatları həyata keçirilir. O, faktiki olaraq bizə müharibə elan edir”, – Lavrov deyib.
Diplomatik gərginlik sentyabrın 7-də daha da artıb. Rusiya Almaniyanın qərarlarına cavab olaraq Almaniyanın Sankt-Peterburqdakı Baş Konsulluğunun bağlanacağını və ölkədəki Höte İnstitutlarının fəaliyyətinin dayandırılacağını açıqlayıb.
