ABŞ administrasiyası Fransanın Vaşinqtona yeni səfir kimi göndərmək istədiyi Orelyen Leşevalyeyə diplomatik aqreman verilməsini gecikdirir və onun təyinatını bloklamaq imkanını nəzərdən keçirir.
MSNews.az xəbər verir ki, “Reuters” dörd mənbəyə istinadən Vaşinqtonun Leşevalyenin namizədliyini gecikdirə və ya tamamilə rədd edə biləcəyini yazıb. Bununla belə, agentliyin məlumatına görə, ABŞ tərəfi hələ yekun qərar qəbul etməyib.
Fransa Prezidenti Emmanuel Makron Leşevalyenin ölkəsinin ABŞ-dakı növbəti səfiri olması üçün tələb olunan sənədləri təqdim edib. Paris onun sentyabr ayında vəzifəsinin icrasına başlamasını və hazırkı səfir Loran Bilini əvəz etməsini planlaşdırırdı. Leşevalye hazırda Fransanın xarici işlər naziri Jan-Noel Barronun aparat rəhbəridir.
Gərginliyin səbəbi Fransanın BMT-nin Cenevrə ofisi yanında daimi nümayəndəliyinin iyulun 25-də yayımladığı paylaşım olub. Missiya ABŞ-ın Volker Türkün BMT-nin İnsan Hüquqları üzrə Ali Komissarı vəzifəsində səlahiyyət müddətinin daha dörd il uzadılmasının əleyhinə səs verməsini sərt şəkildə tənqid edib. Paylaşımda Vaşinqtonun insan hüquqları sahəsində əvvəlki lider mövqeyini itirdiyi bildirilib.
ABŞ Dövlət Departamentinin rəsmisi Fransa tərəfinin ifadələrini “məsuliyyətsiz və hörmətsiz ritorika” kimi qiymətləndirərək Vaşinqtonun bu açıqlamalara uyğun cavab verdiyini söyləyib. Mənbələr paylaşımın Tramp administrasiyasının bəzi yüksəkvəzifəli üzvləri arasında ciddi narazılıq doğurduğunu bildiriblər.
“Le Monde” yazır ki, ABŞ hazırda Leşevalyeyə aqreman verməkdən imtina edir. Nəşrin mənbələrinə əsasən, diplomatın sentyabrın 20-nə planlaşdırılan Vaşinqton səfəri ən yaxşı halda təxirə salına, ən pis halda isə tam bloklana bilər.
Aqreman səfirin rəsmi təyinatından əvvəl qəbul edən dövlətin verdiyi məxfi razılıqdır. Dövlətlər namizədə razılıq vermək məcburiyyətində olmasalar da, ABŞ ilə Fransa kimi uzunmüddətli müttəfiqlər arasında səfir namizədinin bu şəkildə bloklanması nadir diplomatik addım sayılır.
Fransa tərəfi BMT-dəki səsvermə ilə bağlı fikir ayrılığının iki ölkə arasındakı münasibətlərə və əməkdaşlığa xələl gətirməməli olduğunu bildirib. Hər iki ölkənin diplomatlarının gərginliyi azaltmaq və namizədlik məsələsini həll etmək üçün danışıqlar apardığı qeyd olunur.
