Türkiyədə Özgür Özəlin rəhbərliyi ilə Yeni Partiya rəsmən yaradılıb. Yeni siyasi təşkilat Türkiyə Böyük Millət Məclisində mandat sayına görə hakim Ədalət və İnkişaf Partiyasından sonra ikinci yerə yüksələrək ölkənin əsas müxalifət qüvvəsinə çevrilib.
MSNews.az xəbər verir ki, Özgür Özəl və daha 90 deputat — ümumilikdə 91 millət vəkili Cümhuriyyət Xalq Partiyasından istefa verərək Yeni Partiyanın təsisçilər heyətinə qoşulub. Partiyanın yaradılması üçün sənədlər Türkiyə Daxili İşlər Nazirliyinə təqdim edilib.
Özəl sosial şəbəkədə Yeni Partiyanın təsis sənədlərini imzaladığı görüntüləri yayımlayaraq yeni siyasi təşkilatın rəsmən fəaliyyətə başladığını açıqlayıb. “Euronews Türkiyə” partiyanın parlamentdə 91 deputatla təmsil olunacağını və CHP-nin mandat sayının 44-ə düşəcəyini bildirib.
Yeni siyasi qüvvənin yaranmasından sonra TBMM-də əsas partiyaların mandat bölgüsü belə formalaşıb:
- AK Partiya — 277
- Yeni Partiya — 91
- DEM Partiya — 56
- MHP — 46
- CHP — 44
- İYİ Partiya — 29
- Yeni Yol Partiyası — 20
Digər mandatlar kiçik partiyalar və müstəqil deputatlar arasında bölüşdürülüb. Yeni Partiyanın yaranmasından əvvəl TBMM-nin rəsmi məlumatında AK Partiyanın 277, CHP-nin 135, DEM Partiyanın 56, MHP-nin 46, İYİ Partiyanın 29 və Yeni Yol Partiyasının 20 mandatı olduğu göstərilirdi.
Yeni Partiyanın təsis edilməsi CHP-dəki uzunmüddətli rəhbərlik böhranından sonra baş verib. Məhkəmə CHP-nin 2023-cü il qurultayının nəticələrini ləğv etmiş, Özgür Özəli sədr vəzifəsindən uzaqlaşdırmış və Kemal Kılıçdaroğlunu yenidən partiya rəhbərliyinə qaytarmışdı. Özəl və tərəfdarları bu qərardan sonra ayrıca siyasi təşkilatda fəaliyyət göstərmək qərarı veriblər.
Yeni Partiyanın 91 mandatla əsas müxalifət statusu əldə etməsi onun parlament rəhbərliyində, komissiyalarda və TBMM-dəki çıxış müddətlərində CHP-ni əvəz etməsinə səbəb olacaq.
