Böyük Britaniyanın yeni baş naziri Endi Börnem ABŞ-nin İrana qarşı Londonun “müdafiə xarakterli zərbələr” kimi qiymətləndirdiyi əməliyyatlarda Britaniyanın hərbi bazalarından istifadəsini davam etdirməsini təsdiqləyib.
MSNews.az xəbər verir ki, “Bloomberg” mənbələrə istinadən Böyük Britaniyanın RAF Fairford və Hind okeanındakı Dieqo-Qarsiya bazalarını ABŞ təyyarələri üçün açıq saxlayacağını bildirib. Beləliklə, Börnem əvvəlki baş nazir Kir Starmerin bu məsələ ilə bağlı siyasi xəttini dəyişməyib.
Xəbərin əsas detalları “The Times” və digər Britaniya mediası tərəfindən də yayımlanıb.
Məlumata görə, Starmer vəzifədən ayrılmazdan əvvəl cümə günü yüksəkvəzifəli nazirlər və təhlükəsizlik rəsmilərinin iştirakı ilə COBR fövqəladə hallar komitəsinin iclasına sədrlik edib. İclasda mövcud siyasətin davam etdirilməsi, yəni ABŞ-ın Britaniya bazalarından İranın raket imkanlarına və Hörmüz boğazında gəmiləri hədəfə alan obyektlərə qarşı əməliyyatlarda istifadə edə bilməsi barədə razılıq əldə olunub. Börnem qərar barədə məlumatlandırıldıqdan sonra onu dəstəkləyib.
Britaniya hökuməti bu əməliyyatları regionun kollektiv özünümüdafiəsi və beynəlxalq gəmiçiliyin qorunması çərçivəsində təqdim edir. Londonun mövqeyinə əsasən, bazalardan istifadəyə verilən icazə İrana qarşı bütün hücumlara şamil olunmur və yalnız Britaniyanın beynəlxalq hüquqa uyğun hesab etdiyi əməliyyatlarla məhdudlaşdırılır.
Starmer hökuməti mart ayında ABŞ-yə RAF Fairford və ABŞ-Britaniya birgə obyekti olan Dieqo-Qarsiyadan istifadə etməyə icazə vermişdi. Həmin vaxt London İranın Hörmüz boğazındakı gəmiləri hədəfə alan raket obyektlərinə qarşı zərbələrin müdafiə məqsədi daşıdığını bildirmişdi. Kiprdəki RAF Akrotiri bazası isə bu razılaşmadan kənarda saxlanılmışdı.
Yeni qərar Britaniya bazalarının ABŞ-ın hazırkı əməliyyatlar dalğasının müəyyən hissəsində istifadə oluna biləcəyini göstərir. Bununla belə, Dieqo-Qarsiya və RAF Fairforddan konkret olaraq hansı son uçuşların və zərbələrin həyata keçirildiyi barədə tam əməliyyat məlumatları açıqlanmayıb.
Börnemin qərarı Britaniyada siyasi mübahisələrə səbəb ola bilər. Yaşıllar Partiyası və Liberal Demokratların bəzi nümayəndələri bazaların istifadəsinin Böyük Britaniyanı müharibəyə dolayı şəkildə cəlb etdiyini iddia edirlər. Hökumət isə ölkənin hücum əməliyyatlarına qoşulmadığını və yalnız məhdud müdafiə dəstəyi göstərdiyini bildirir. (Report.az)
