ABŞ administrasiyası amerikalı hərbçilərin İordaniya və İraqda həlak olmasından sonra İrana qarşı hərbi əməliyyatların daha da genişləndirilməsi variantlarını nəzərdən keçirir.
MSNews.az xəbər verir ki, “The Washington Post” məsələ ilə tanış rəsmilərə istinadən Vaşinqtonun İranla yenidən tammiqyaslı müharibənin astanasında olduğunu yazıb. Mənbələrdən biri Ağ Evdə mövcud hərbi əməliyyatların genişləndirilməsi imkanlarının müzakirə edildiyini bildirib.
Nəşrin məlumatına görə, Pentaqon Yaxın Şərqdə döyüş təyyarələrinin sayını artırır. Bununla belə, hava hücumundan müdafiə vasitələrinin və uzaqmənzilli sursatların ehtiyatlarının azalması, həmçinin əlavə qüvvələrin bölgəyə yerləşdirilməsi imkanlarının məhdud olması daha geniş əməliyyatı çətinləşdirə bilər. Mənbələrdən biri ABŞ-ın əməliyyatları hazırkı intensivliklə təhlükəsiz şəkildə davam etdirmək üçün kifayət qədər resursa malik olmaya biləcəyini deyib.
Gərginlik İranda vurulan PUA-nın İraqın şimalında zərərsizləşdirilməsi zamanı bir amerikalı hərbçinin həlak olmasından sonra daha da artıb. İordaniyadakı ABŞ hərbi bazasına İranın raket hücumu nəticəsində isə iki hərbçi ölüb, daha bir nəfərlə bağlı tapılan qalıqların identifikasiyası aparılır. “Reuters” müharibənin başlanmasından bəri həlak olan ABŞ hərbçilərinin sayının 17-yə, yaralananların isə 420-dən çox olduğunu bildirir.
ABŞ Mərkəzi Komandanlığı — CENTCOM iyulun 20-də İrana qarşı ardıcıl doqquzuncu gecə zərbələri həyata keçirib. Zərbələrin İranın hərbi komanda məntəqələrini, hava hücumundan müdafiə sistemlərini, raket və PUA buraxılış mövqelərini, sahil müşahidə qurğularını və rabitə şəbəkələrini hədəfə aldığı açıqlanıb.
İran isə ABŞ-nin İordaniya, Küveyt və Suriyadakı hərbi obyektlərinə raket və PUA hücumları həyata keçirdiyini bildirib. Hörmüz boğazında gəmiçilik də ciddi şəkildə məhdudlaşıb və qarşılıqlı hücumlar qlobal enerji təchizatı ilə bağlı narahatlığı artırıb.
