Türkiyənin İran hakimiyyətini devirmək məqsədilə planlaşdırıldığı iddia olunan kürd quru əməliyyatına qarşı çıxdığı və təşəbbüsün həyata keçirilməsinin qarşısını aldığı bildirilir.
MSNews.az xəbər verir ki, İsrailin “Kan” yayım korporasiyası ABŞ və İsrailin İranın qərbində fəaliyyət göstərən kürd qruplaşmalarına logistika və hava dəstəyi verməyi nəzərdən keçirdiyini yazıb. Məqsədin İran təhlükəsizlik qüvvələrini ölkənin qərb sərhədində məşğul etmək və hakimiyyətə qarşı daxili təzyiqi artırmaq olduğu iddia edilib.
“Reuters” üç mənbəyə istinadən İsrailin İran Kürdüstanı qruplaşmaları ilə təxminən bir il danışıqlar apardığını və İranın sərhəd şəhərlərinin ələ keçirilməsinin müzakirə olunduğunu bildirib. Mənbələr mümkün quru əməliyyatının ABŞ və İsrailin hava dəstəyi olmadan həyata keçirilməsinin çətin olacağını deyiblər. İsrail hökuməti və ordusu isə bu əməkdaşlığı açıq şəkildə təsdiqləməyib.
İsrailin “Ynet” nəşrinin məlumatına görə, Türkiyə İraqdan İrana doğru hərəkət etdiyi iddia olunan təxminən 500 kürd döyüşçünün əməliyyata qoşulmasının qarşısını alıb. Ankara İraq Kürdüstanının siyasi rəhbərliyinə əməkdaşlıq etməmək barədə xəbərdarlıq edib, PKK-ya isə plana qoşulacağı təqdirdə tədbir görüləcəyi mesajını çatdırıb.
“Asharq Al-Awsat” Türkiyə mənbələrinə istinadən yazıb ki, PKK və onun İran qolu hesab edilən PJAK əməliyyata qoşularsa, Ankara Şimali İraqda Suriyadakı əməliyyatlarına bənzər hərbi müdaxiləyə başlaya bilər. Türkiyə nümayəndələrinin İraq Kürdüstanı rəsmilərinə “Suriyada etdiyimiz kimi müdaxilə edəcəyik” mesajını çatdırdığı iddia olunur.
