ABŞ Tren de Araqua qruplaşmasının lideri Hektor Rusthenford Qerrero Floresin Venesuelada keçirilən əməliyyat zamanı öldürüldüyünü açıqlayıb.
MSNews.az xəbər verir ki, ABŞ müharibə naziri Pit Heqset “X” hesabında bu həftənin əvvəlində ABŞ Müdafiə Nazirliyinin Venesuela təhlükəsizlik qüvvələri ilə tam əməkdaşlıq şəraitində Tren de Araqua kompleksinə “kinetik zərbə” endirdiyini bildirib.
Heqsetin sözlərinə görə, qruplaşmanın təsisçisi və lideri, “Niño Guerrero” kimi tanınan Hektor Rusthenford Qerrero Floresin hücum zamanı öldürüldüyü təsdiqlənib. O, əməliyyatı ABŞ və Venesuelanın “narkoterrorçulara qarşı mübarizədə” ortaq qətiyyətinin göstəricisi kimi qiymətləndirib.
“The Guardian” yazır ki, ABŞ prezidenti Donald Tramp da “Truth Social” hesabında Qerrero Floresin ABŞ Cənub Komandanlığı tərəfindən həyata keçirilən “sürətli və ölümcül” zərbə nəticəsində öldürüldüyünü açıqlayıb. Tramp əməliyyatın Venesuela tərəfi ilə koordinasiya edildiyini bildirib.
Venesuela hökuməti də Qerrero Floresin ölkənin cənub-şərqində, Bolivar ştatında keçirilən birgə əməliyyat zamanı öldürüldüyünü təsdiqləyib. Həmin bölgə qanunsuz qızıl hasilatı və silahlı qrupların fəaliyyəti ilə tanınır.
“The Washington Post” mənbələrə istinadən yazır ki, zərbəni ABŞ Xüsusi Əməliyyatlar Komandanlığına bağlı qüvvələr həyata keçirib, kəşfiyyat məlumatlarının əldə edilməsində isə MKİ iştirak edib. Nəşr qeyd edir ki, ABŞ Cənub Komandanlığı Venesuela təhlükəsizlik qüvvələrinə birgə əməliyyata dəstəyə görə təşəkkür edib.
Qerrero Flores ABŞ-da axtarışda olan fiqurlardan biri idi. ABŞ Ədliyyə Nazirliyi 2025-ci ilin dekabrında onu reketçilik, terrorizmə dəstək, narkotik ticarəti və silah cinayətləri ilə bağlı ittiham etmişdi. ABŞ Dövlət Departamenti daha əvvəl onun tutulmasına və ya məhkum edilməsinə aparan məlumat üçün 5 milyon dollara qədər mükafat elan etmişdi.
Tren de Araqua Venesuelada yaranmış və son illərdə Latın Amerikası, ABŞ və Avropada fəaliyyətini genişləndirmiş transsərhəd cinayət qruplaşması hesab olunur. ABŞ administrasiyası qruplaşmanı xarici terror təşkilatı kimi tanıyır.
