Rusiyanın Ukraynaya qarşı müharibəsi fonunda “Axmat” xüsusi təyinatlı qüvvələrinin daxilində qohumluq əlaqələri və imtiyazlı xidmət şəraiti ilə bağlı yeni iddialar gündəmə gəlib.
MSNews.az-ın “Vot Tak” nəşrinə istinadən məlumatına görə, araşdırmada “Axmat” xüsusi təyinatlı qüvvələrinin komandiri Apti Alaudinovun bir sıra qohumları və yaxın çevrəsinin cəbhə xəttindən uzaqda yerləşən bölmələrdə xidmət etdiyi iddia olunur.
Araşdırmada bildirilir ki, Alaudinovun əmioğlusu Vaxa Saayevin rəhbərlik etdiyi “Vaxa” batalyonu Belqorod vilayətində, Ukrayna ilə sərhəddən azı 20 kilometr məsafədə dislokasiya olunub. “Vot Tak”ın iddiasına əsasən, həmin bölmədə Alaudinovun bir neçə qohumu da xidmət edib.
“Radio Svoboda” araşdırmaya istinadən yazır ki, “Vaxa” batalyonunda hərbçilər otaqlarda bir neçə nəfərlə yerləşdirilir, binalarda elektrik enerjisi və qızdırıcılar var. Nəşrin məlumatına görə, bölmədə xidmət edən şəxslərin yerli kafelərə getmək imkanı, həmçinin Çin istehsalı yolsuzluq avtomobilləri və bahalı “Toyota Tundra II” pikapı olan avtoparkı mövcuddur.
“Vot Tak”ın ayrıca materialında qeyd olunur ki, Alaudinovun ailəsinə mənsub ən azı 26 kişi qohumun bir hissəsi dövlət strukturlarında, o cümlədən Çeçenistan Daxili İşlər Nazirliyində və Federal Məhkəmə Pristavları Xidmətində çalışıb və ya hazırda çalışır. Nəşrin hesablamasına görə, Alaudinovun azı 12 qohumu “Axmat” xüsusi təyinatlı qüvvələrində xidmət edib.
Araşdırmada həmçinin bildirilir ki, Alaudinovun qohumları ilə yanaşı, onun keçmiş iş yoldaşları və yaxın tanışları da “Axmat”ın müxtəlif bölmələrində təmsil olunublar. Müəlliflər bunu Çeçenistanın güc strukturlarında illər ərzində formalaşmış qohumluq və şəxsi əlaqələr sisteminin davamı kimi qiymətləndirirlər.
Apti Alaudinov Rusiya ordusunda general-leytenant, Rusiya Silahlı Qüvvələrinin Baş Hərbi-Siyasi İdarəsi rəisinin müavini və “Axmat” könüllü birləşməsinin komandiri kimi tanınır.
“Kavkazskiy Uzel” onun 2024-cü ilin aprelində Rusiya Silahlı Qüvvələrinin Baş Hərbi-Siyasi İdarəsi rəisinin müavini təyin edildiyini yazır.
Materialda Alaudinovun müharibədə iştirakın vacibliyi barədə ictimai çağırışları ilə onun qohumlarının iddia olunan xidmət şəraiti arasında ziddiyyətə diqqət çəkilir.
