ABŞ-ın müstəqilliyinin 250 illiyi ərəfəsində planlaşdırılan “Freedom 250” tədbirləri bir sıra ifaçıların imtinası və siyasi mübahisələr fonunda qalmaqala çevrilib.
MSNews.az xəbər verir ki, “Reuters”in məlumatına görə, “Poison” qrupunun solisti Bret Miçels “Freedom 250” konsertlərində iştirakdan imtina edən beşinci musiqiçi olub. O, tədbirin əvvəlcə tərəfsiz və ümummilli bayram kimi təqdim edildiyini, lakin sonradan daha bölücü xarakter aldığını bildirib.
“The Guardian” isə ABŞ-ın 250 illiyi üçün planlaşdırılan konsert seriyasında elan olunmuş doqquz əsas ifaçıdan ən azı yeddisinin 48 saat ərzində iştirakdan imtina etdiyini yazıb. İmtina edənlər arasında “Young MC”, “The Commodores”, “Morris Day and The Time”, Martina MakBrayd və Bret Miçels kimi adlar çəkilir.
“Freedom 250” ABŞ Prezidenti Donald Trampın administrasiyası ilə əlaqəli yubiley təşəbbüslərindən biri kimi təqdim olunur. “America250”in məlumatına görə, “Freedom 250” Prezidentin milli imza tədbirlərinin həyata keçirilməsinə rəhbərlik edəcək təşəbbüsdür. “Freedom 250”in rəsmi saytında isə “Great American State Fair”in iyunun 25-dən iyulun 10-dək Vaşinqtondakı National Mall ərazisində keçiriləcəyi bildirilir.
“Reuters” yazır ki, konsertlər əvvəlcə “Great American State Fair”in açılış mərasimi kimi nəzərdə tutulmuşdu. Lakin bir sıra musiqiçilərin tədbirin siyasi əlaqələri ilə bağlı narahatlıq ifadə edərək çəkilməsindən sonra proqramın davamlılığı sual altına düşüb. Təşkilatçılar isə tədbirin məqsədinin amerikalıları ölkənin 250 illiyi ətrafında birləşdirmək olduğunu bildiriblər.
Qalmaqalın ən çox müzakirə olunan tərəflərindən biri isə tədbir üçün bəzi ifaçıların cəlb olunmasında rol oynayan musiqi agentinin adı ilə bağlıdır. “The Independent”in məlumatına görə, bu işdə adı keçən şəxs “Universal Attractions Agency”nin həmsahibi və prezidenti Ceff Epşteyndir. Onun bədnam maliyyəçi Ceffri Epşteynlə heç bir əlaqəsi yoxdur, lakin ad oxşarlığı ABŞ-ın gecə şoularında və sosial şəbəkələrdə geniş zarafat mövzusuna çevrilib.
“The Independent” yazır ki, Con Stüart və Cimmi Kimmel bu təsadüfi ad oxşarlığını efirdə müzakirə ediblər. Nəticədə adətən pərdə arxasında çalışan musiqi sənayesi nümayəndəsi Ceff Epşteyn “Freedom 250” qalmaqalının gözlənilməz simalarından birinə çevrilib.
ABŞ-ın 250 illiyi ətrafında mübahisələr ölkədə milli kimlik və siyasi qütbləşmə ilə bağlı daha geniş narahatlıqlar fonunda baş verir. “Elon University Poll”un nəticələrinə görə, amerikalıların 52 faizi ABŞ-ın öz qurucu ideallarına uyğun yaşamadığını düşünür, 73 faizi isə ölkədə demokratiyanın ümumi vəziyyətini “orta” və ya “pis” qiymətləndirir.
“Quinnipiac University Poll”un sorğusunda da oxşar mənzərə əks olunub. Sorğuya görə, amerikalıların 61 faizi ölkənin Müstəqillik Bəyannaməsində göstərilən bərabərlik və azadlıq ideallarına uyğun yaşamadığını düşünür. Eyni sorğuda respondentlərin 57 faizi ABŞ-da demokratiya sisteminin işləmədiyini bildirib.
Milli qürur göstəricilərində də azalma müşahidə olunur. “Gallup”un məlumatına görə, ABŞ vətəndaşlarının yalnız 58 faizi özünü “son dərəcə” və ya “çox” qürurlu amerikalı kimi təqdim edir. Bu, Gallup-un uzunmüddətli ölçmələrində ən aşağı göstəricidir. Gənc nəsillər arasında milli qürur göstəricisinin daha aşağı olması da diqqət çəkir.
Bununla belə, “Freedom 250” ətrafındakı böhranın ABŞ-ın 250 illiyi tədbirlərinin hamısını əhatə etdiyini demək doğru olmaz. “America250” rəsmi platforması ölkə üzrə müxtəlif yerli və milli tədbirlərin planlaşdırıldığını, yubileyin ABŞ tarixini, vətəndaş töhfələrini və gələcək baxışını əhatə edən geniş proqram kimi nəzərdə tutulduğunu bildirir.
Hazırda “Freedom 250” konsertlərinin ilkin formada davam edib-etməyəcəyi tam aydın deyil. Ancaq musiqiçilərin imtinası, Jeff Epstein adı ətrafında yaranan ironik qalmaqal və sorğularda görünən ictimai narahatlıq ABŞ-ın 250 illik yubileyinin siyasi baxımdan həssas atmosferdə keçiriləcəyini göstərir.
