İngiltərəli darts ulduzu Lyuk Littler karyerasında ikinci dəfə Premyer Liqa çempionu olub.
“Sky Sports” xəbər verir ki, Londondakı “The O2” arenasında keçirilən finalda Littler həmyerlisi Lyuk Hamfrisi 11:10 hesabı ilə məğlub edib. Qarşılaşma son leqə qədər davam edib və mövsümün ən dramatik finallarından biri kimi yadda qalıb.
Finalın həlledici anında Littlerin 54 xal bağlaması lazım idi. Normal ssenaridə o, 14 və D20 ilə oyunu bitirə bilərdi. Lakin ilk dart 14 sektoruna yox, 11-ə düşüb. Buna baxmayaraq, Littler vəziyyətdən çıxıb: əvvəlcə 3 sektorunu vurub, sonra isə D20 — “double top”la qələbəni rəsmiləşdirib.
“BBC Sport” canlı yayımında həmin epizodu belə təsvir edib: Littlerin ilk dartı 11 sektoruna düşüb, lakin o, daha sonra 3 və D20 ilə finalı bağlayıb. Bu zərbə 19 yaşlı idmançıya ikinci Premyer Liqa titulunu qazandırıb.
Littler finala gedən yolda yarımfinalda Geruin Praysı 10:9 hesabı ilə məğlub edib. Hamfris isə digər yarımfinalda Conni Kleytonu eyni hesabla üstələyib. “Sky Sports”un məlumatına görə, final gecəsində oynanılması mümkün olan bütün 59 leq baş tutub və hər üç görüş son legdə müəyyənləşib.
“PDC Europe” yazır ki, Littler bu qələbə ilə Fil Teylor, Maykl van Gerven və Qari Andersondan sonra Premyer Liqanı birdən çox dəfə qazanan oyunçular sırasına qoşulub.
Littler daha əvvəl 2024-cü ildə Premyer Liqa çempionu olmuşdu. 2025-ci ildə titul Hamfrisə keçmişdi. Bu dəfə isə “The Nuke” ləqəbli gənc ulduz kuboku geri qaytarmağı bacarıb.
