Somalinin şimal-şərq sahillərində yanacaq daşıyan tanker silahlı şəxslər tərəfindən ələ keçirilib. Hadisə Puntland bölgəsinin Hind okeanı sahilində, Hafun və Banderbeyla yaşayış məntəqələri arasındakı sularda baş verib. Tankerin Berbera limanından çıxaraq Somalinin paytaxtı Moqadişuya doğru hərəkət etdiyi bildirilir.
MSNews.az xəbəri “Associated Press”-ə istinadən verir.
Məlumata görə, hücumu Banderbeyla bölgəsindən olan altı silahlı şəxs həyata keçirib. Böyük Britaniyanın Dəniz Ticarəti Əməliyyatları İdarəsi də Somali sahillərində tankerə icazəsiz şəxslərin nəzarəti ələ keçirməsi barədə məlumat yayıb və gəminin Somali ərazi sularında cənuba doğru hərəkət etdirildiyini bildirib.
“The Maritime Executive” BBC-yə istinadən yazır ki, 3 min dedveyt tonluq “Honour 25” tankeri aprelin 22-də sahildən təxminən 30 dəniz mili məsafədə ələ keçirilib. Bildirilir ki, gəmidə 17 heyət üzvü saxlanılır, daha sonra isə gəmiyə əlavə beş silahlı şəxs minib.
Gəmi Pakistan maraqlarına bağlıdır və yerli iş adamları tərəfindən icarəyə götürülüb. Puntland rəsmisi tankerin böyük həcmdə yanacaq daşıdığını bildirib. Hazırda yerli hakimiyyət və Puntland təhlükəsizlik qüvvələri gəminin və heyətin azad edilməsi üçün təzyiq altındadır. Hələlik fidyə tələbi ilə bağlı rəsmi məlumat yoxdur.
Somali sahillərində piratlıq beynəlxalq hərbi-dəniz patrulları və təhlükəsizlik tədbirləri nəticəsində son onillikdə ciddi şəkildə azalsa da, bu hadisə regionda dəniz quldurluğunun yenidən aktivləşməsi ilə bağlı narahatlıqları artırıb.
