Hindistanın rəqabət tənzimləyicisi dünyanın ən böyük pivə istehsalçısı olan “AB InBev”-i kartel araşdırmasında şahid statusundan çıxarıb birbaşa istintaq tərəfinə çevirib.
“Reuters”-in əldə etdiyi məhkəmə sənədləri və mənbələrə görə, bu dəyişiklik şirkətlə tənzimləyici arasında yeni məhkəmə çəkişməsinə səbəb olub.
Məlumata əsasən, Hindistanın Rəqabət Komissiyası 2022-ci ildən ölkənin ən çox pivə istehlak edilən ştatı olan Telanqanada 42 alkoqol pərakəndəçisini araşdırır. İddia olunur ki, həmin satıcılar “AB InBev” məhsullarını önə çıxarmaq və “Heineken”-in “United Breweries” bölməsi ilə “Carlsberg” kimi rəqibləri kənarda saxlamaq üçün kartel xarakterli razılaşmalara gediblər.
Nəşr yazır ki, “AB InBev”-in statusu 2025-ci ilin noyabrında “üçüncü tərəf”dən “istintaq altında olan tərəf”ə dəyişdirilib. Şirkət məhkəməyə təqdim etdiyi sənədlərdə bu addımın əvvəlcədən bildiriş, dinləmə və əsaslandırılmış qərar olmadan atıldığını, buna görə də prosedur baxımından ədalətsiz olduğunu bildirib.
Aprelin 16-da Karnataka ştatında keçirilən qısa məhkəmə baxışından sonra hakim “AB InBev”-ə qarşı istintaqın icrasını müvəqqəti dayandırıb. “Reuters”-ə danışan mənbələrdən birinin sözlərinə görə, məhkəmə şirkətin iradlarında ilkin əsas gördüyü üçün bu qərarı verib.
Hüquqşünasların qiymətləndirməsinə görə, bir şirkətin üçüncü tərəf statusundan təqsirləndirilən tərəfə keçirilməsi ciddi hüquqi dönüş sayılır və bu, araşdırmaçıların həmin subyektə qarşı müəyyən dəlillər gördüyünü göstərir. Əgər tənzimləyici məhkəmə blokunu ləğv etdirə bilsə və “AB InBev” təqsirli bilinsə, şirkət hər pozuntu ili üzrə mənfəətinin üç mislinə və ya dövriyyəsinin 10 faizinə qədər cərimə ilə üzləşə bilər.
Bu iş Hindistan pivə sektorunda son illərin ən diqqətçəkən antiinhisar proseslərindən biri hesab olunur. “Reuters” xatırladır ki, 2021-ci ildə “Heineken”-ə bağlı “United Breweries” və “Carlsberg” qiymət sövdələşməsi işi üzrə ümumilikdə 100 milyon dollardan çox cərimələnmişdi və həmin araşdırmada “AB InBev” məlumat verən tərəf kimi çıxış etmişdi.
