Rusiya millisi beynəlxalq yoxlama oyununda Misir yığmasına 0:1 hesabı ilə məğlub olub.
Qahirədə keçirilən qarşılaşmada görüşün taleyini ikinci hissədə vurulan qol həll edib. Misir millisinin hücumçusu Mostafa Ziko 65-ci dəqiqədə başla fərqlənərək komandasına qələbə qazandırıb. Görüş Valeri Karpinin rəhbərlik etdiyi Rusiya yığması üçün hücum baxımından uğursuz alınıb.
“Çempionat”ın statistik məlumatına görə, Rusiya millisi oyun ərzində 8 zərbə endirsə də, bunlardan yalnız biri qapı çərçivəsinə düşüb. Misir isə 11 zərbədən 4-nü qapıya ünvanlayıb. Sayt matçın sonunda Rusiya millisinin hücumda zəif təsir bağışladığını və cəmi bir dəqiq zərbənin çox aşağı nəticə olduğunu yazıb.
Qeyd edək ki, Misir bu görüşə əsas ulduzu Məhəmməd Salah olmadan çıxıb. Salah yığmaya yenicə qoşulduğu üçün bu yoxlama oyununda istirahət edib. Misir millisi 2026-cı il dünya çempionatına hazırlıq çərçivəsində növbəti yoxlama matçını Braziliyaya qarşı keçirəcək.
