ABŞ Federal Təhqiqat Bürosunun (FTB) direktoru Kaş Patel “The Atlantic” nəşri və jurnalist Sara Fitspatrikə qarşı 250 milyon dollarlıq böhtan iddiası qaldırıb. Məhkəmə sənədlərinə əsasən, Patel jurnalın onun guya spirtli içki problemi yaşadığı, işə tez-tez gəlmədiyi və rəhbərliyi dövründə FTB fəaliyyətinin pozulduğu barədə yazısını “qərəzli və yalan dolu material” adlandırıb.
Xəbəri “Reuters”-ə istinadən MSNews.az verir.
Məqalə əvvəlcə “Kash Patel’s Erratic Behavior Could Cost Him His Job” başlığı ilə yayımlanıb. Yazıda iyirmidən çox anonim mənbəyə istinad edilərək Patelin “açıq sərxoşluğu”, “izahsız yoxa çıxmaları” və bunun FTB ilə Ədliyyə Nazirliyində narahatlıq yaratdığı iddia olunurdu. Daha sonra materialın onlayn başlığı “The FBI Director Is MIA” olaraq dəyişdirilib.
Kaş Patel bütün ittihamları qəti şəkildə rədd edib. Onun vəkilləri bildiriblər ki, jurnal yazını dərc etməzdən əvvəl ittihamların yalan olduğu barədə xəbərdar edilsə də, buna baxmayaraq material yayımlanıb. İddiada “The Atlantic”in ictimai fiqur barədə bilərəkdən və ya həqiqəti nəzərə almadan yalan məlumat yaydığı, yəni ABŞ hüququnda “actual malice” standartını pozduğu iddia edilir.
“The Atlantic” isə geri çəkilməyib. Nəşrin rəhbərliyi rəsmi açıqlamada reportajın arxasında dayandıqlarını və “əsassız məhkəmə iddiasına qarşı qətiyyətlə müdafiə olunacaqlarını” bəyan edib.
Hüquq ekspertləri qeyd edirlər ki, ABŞ-da ictimai vəzifə daşıyan şəxslərin böhtan işlərində qalib gəlməsi çətindir. Çünki onlar təkcə məlumatın yalan olduğunu deyil, həm də medianın bunu bilərəkdən və ya kobud məsuliyyətsizliklə yaydığını sübut etməlidirlər.
