İranın Donald Trampın maliyyə təklifini rədd etməsi və İsrailə hücuma hazırlaşması barədə iddia hələlik tam təsdiqini tapmayıb.
MSNews.az xəbər verir ki, sosial şəbəkələrdə ABŞ Prezidenti Donald Trampın İrana əlavə maliyyə vəsaiti təklif etdiyi, bunun qarşılığında Tehrandan İsrailə qarşı cavab və ya düşmənçilik xarakterli addımlardan imtina tələb olunduğu barədə məlumat yayılıb.
Lakin “Reuters”in məlumatına görə, müzakirə olunan layihə daha çox İranın dondurulmuş aktivlərinin mərhələli şəkildə buraxılması, neft ixracına tətbiq edilən sanksiyalara güzəştlər və Hörmüz boğazının açılması ilə bağlıdır. Mənbələr bu məsələlərin ABŞ-İran razılaşması çərçivəsində müzakirə olunduğunu bildirirlər.
“The New Arab” İran mediasına istinadən yazır ki, Tehran ABŞ-la mümkün saziş layihəsi üzrə hələ yekun qərar qəbul etməyib. Qətər nümayəndə heyətinin də vasitəçilik prosesi çərçivəsində Tehranda danışıqlar apardığı bildirilir.
Bununla yanaşı, regionda gərginlik yenidən artıb. “The Guardian” yazır ki, İsrailin Beyrutun cənub ətrafına zərbəsindən sonra İranın Ali Milli Təhlükəsizlik Şurası cavabın “yaxın” olduğunu bəyan edib. Tramp isə tərəfləri təmkinli olmağa çağıraraq İsrailin Livandakı hücumlarının baş verməməli olduğunu bildirib.
“Al Jazeera”ın məlumatına görə, ABŞ və İran mümkün razılaşmanın ilk mərhələsinə yaxınlaşsa da, tərəflər sənədin imzalanma vaxtı ilə bağlı fərqli mövqe nümayiş etdirirlər.
Beləliklə, İranın Trampın maliyyə təklifini rəsmən rədd etməsi barədə məlumat hələlik təsdiqlənmiş fakt kimi təqdim edilə bilməz. Hazırda təsdiqlənən əsas məqam ABŞ-İran razılaşması üzrə danışıqların davam etməsi və İsrailin Livandakı zərbələrindən sonra Tehranın sərt cavab siqnalı verməsidir.
