Macarıstanda keçirilən parlament seçkisində baş nazir Viktor Orban məğlubiyyəti qəbul edib və müxalif “Tisza” partiyasının lideri Peter Madyarı qələbə münasibətilə təbrik edib.
“Associated Press”-in məlumatına görə, Peter Madyar bildirib ki, Orban ona telefonla zəng edərək qalibiyyət münasibətilə təbrikini çatdırıb.
Nəşrin yaydığı məlumata əsasən, Orban nəticəni “ağrılı” adlandırıb və “Fidesz”in bundan sonra vətənə və millətə müxalifətdən xidmət edəcəyini bildirib. Agentlik onun 16 illik fasiləsiz hakimiyyətdən sonra ilk dəfə seçkidə geri düşdüyünü qeyd edir.
İlkin rəsmi nəticələrə görə, səsvermənin erkən mərhələsində “Tisza” 51 faiz, “Fidesz” isə 40 faiz civarında dəstək alırdı və Madyarın partiyası 106 seçki dairəsindən 95-də öndə görünürdü. “Reuters”-in daha erkən hesablamasında 29 faiz bülleten sayıldıqdan sonra “Tisza”nın 132 mandat qazana biləcəyi göstərilirdi. Bu, o deməkdir ki, yekun rəqəmlər dəyişə bilsə də, siyasi xətt artıq aydın görünür: Orban dövrü bitməyə çox yaxındır.
Seçkiyə maraq rekord səviyyədə olub. Seçici fəallığı post-kommunist Macarıstan tarixində ən yüksək göstəricilərdən birinə çataraq 77 faizdən çox olub. Budapeştdə bir sıra məntəqələr önündə uzun növbələr müşahidə edilib.
Bu nəticə təkcə Budapeşt üçün deyil, Avropa siyasəti üçün də böyük dönüş sayılır. “Reuters” yazır ki, Orbanın məğlubiyyəti təsdiqlənərsə, bu, Macarıstanın Aİ daxilindəki qarşıdurmacı mövqeyini zəiflədə, Ukrayna üçün bloklanmış 90 milyard avroluq yardımın önünü aça və Rusiyanın Avropa Birliyindəki əsas siyasi tərəfdaşlarından birini itirməsi ilə nəticələnə bilər.
Peter Madyar isə kampaniyasını korrupsiya ilə mübarizə, Aİ ilə münasibətlərin normallaşdırılması, dövlət xidmətlərinin bərpası və Macarıstanın “Şərq yox, Qərb yolu” seçməsi tezisi üzərində qurmuşdu. Onun sürətli yüksəlişi son iki ildə Orban sistemindən narazı qalan seçicilər, xüsusilə gənclər arasında ciddi dəstək qazanmışdı.
