Haitinin şimalındakı tarixi Laferriyer qalasında baş verən izdiham nəticəsində azı 30 nəfər ölüb. Rəsmilər bildirirlər ki, ölənlərin sayı arta bilər. Hadisə aprelin 12-də, ölkənin ən məşhur tarixi məkanlarından biri sayılan “Citadelle Laferrière”-də qeydə alınıb.
Məlumatı “Reuters”-ə istinadən MSNews.az verir.
Haitinin Nord departamenti üzrə Mülki Müdafiə rəhbəri Jan Anri Peti “Reuters”-ə bildirib ki, izdiham qala girişində baş verib. Onun sözlərinə görə, UNESCO-nun Dünya İrsi siyahısına daxil olan bu məkanda həmin gün illik tədbir keçirilirdi və ərazi tələbələr, gənclər və digər ziyarətçilərlə dolu idi. Yağışın yağması da vəziyyəti daha da ağırlaşdırıb.
Baş nazir Aliks Didye Fils-Em faciə ilə bağlı başsağlığı verib və çoxlu sayda gəncin tədbirdə iştirak etdiyini vurğulayıb. Xilasedicilər hadisədən sonra ərazidə mümkün sağ qalanların axtarışını davam etdiriblər.
Laferriyer qalası Haitinin müstəqillikdən sonrakı ilk illərində inşa edilmiş simvolik istehkamdır. UNESCO-nun məlumatına görə, Citadel, Sans-Souci və Ramiers Milli Tarix Parkının tərkib hissəsi olan bu qala 1982-ci ildən Dünya İrsi siyahısındadır və Haitinin ən mühüm tarixi abidələrindən biri sayılır.
Faciə Haitinin onsuz da dərin böhran yaşadığı dövrə təsadüf edir. Ölkə son illərdə həm bandaların zorakılığı, həm də ardıcıl fəlakətlərlə üzləşib.
