Yaponiya millisi 2026-cı il dünya çempionatına hazırlıq çərçivəsində Meksikanın Monterrey şəhərində məşq məkanını dəyişməli olub.
MSNews.az xəbər verir ki, “Associated Press”in məlumatına görə, Yaponiya yığması əvvəlcə “Tigres UANL” klubunun məşq bazasında hazırlaşırdı. Lakin futbolçular qeyri-bərabər və bəzi hissələri torpaq ləkələri ilə örtülmüş meydança ilə qarşılaşıblar.
Yaponiya nümayəndə heyəti bundan sonra məşqləri “Rayados de Monterrey” klubuna məxsus “El Barrial” bazasında davam etdirməyə qərar verib. Rəsmi nümayəndələr məkan dəyişikliyinin səbəbini detallı açıqlamasalar da, beynəlxalq media qərarın meydançanın vəziyyəti ilə bağlı olduğunu yazır.
“ESPN”in məlumatına görə, futbolçular əvvəlki meydançada sərt və çala-çuxurlu örtükdən narahat olublar. Yaponiyanın yarımmüdafiəçisi Takefusa Kubo meydançanın “çox yaxşı olmadığını” və oyunçuların zədə riskindən çəkindiyini bildirib.
“talkSPORT” yazır ki, komanda hətta Monterreydən tamamilə ayrılmağı da nəzərdən keçirib, lakin sonradan yerli rəsmilər və klub nümayəndələri ilə danışıqlardan sonra “El Barrial” bazasına keçid mümkün olub.
“The Straits Times”ın Yaponiya mediasına istinadən yaydığı məlumata görə, baş məşqçi Hacime Moriyasunun komandası Meksikaya gəldikdən sonra hazırlıq prosesində iki dəfə meydança dəyişməli olub. İlk meydançanın vəziyyətinin pis hava şəraiti səbəbindən pisləşdiyi bildirilir.
Yaponiya Futbol Assosiasiyasının rəsmi təqviminə əsasən, “Samurai Blue” DÇ-2026-da ilk oyununu iyunun 14-də Niderland millisinə qarşı Dallasda keçirəcək. Yaponiya qrup mərhələsində iyunun 20-də Monterreydə Tunis, iyunun 25-də isə yenidən ABŞ-da İsveç yığması ilə qarşılaşacaq.
