İtaliyanın “Venesiya” klubu “Seriya B”-də çempionluğu və “A Seriyası”na yüksəlişi Venesiyanın məşhur kanallarında qayıq paradı ilə qeyd edib.
“Reuters”-in məlumatına görə, futbolçular və klub heyəti əsas gondolda şəhər kanalları boyunca hərəkət edib, minlərlə azarkeş isə qayıqlar və şəxsi katerlərlə onları müşayiət edib.
“Venesiya” “A Seriyası”na yüksəlişi mayın 1-də “Spezia” ilə 2:2 hesablı heç-heçədən sonra təmin edib, “Seriya B” titulunu isə “Palermo” üzərində 2:0 hesablı qələbə ilə rəsmiləşdirib. Komanda mövsümü “Frozinone”dən bir xal öndə tamamlayaraq çempion olub və bir mövsümlük fasilədən sonra İtaliya futbolunun elit divizionuna qayıdıb.
Bayram zamanı Venesiyanın kanalları yaşıl, qara və narıncı rənglərə bürünüb. Azarkeşlər klub bayraqları dalğalandırıb, tüstü fişəngləri yandırıb və futbolçuları qayıqlardan alqışlayıblar. “Reuters” yazır ki, bəzi ərazilərdə kanallar qayıqların çoxluğundan demək olar görünməz hala gəlib, sakinlər isə bayramı ətrafdakı tarixi binaların eyvanlarından izləyiblər.
Təntənəli yürüş Piatsa San Markoda başa çatıb. Klubun rəsmi məlumatına görə, meydanda nəhəng ekranlar quraşdırılıb və parad canlı yayımlanıb. Komanda burada “Seriya B” kubokunu azarkeşlərə təqdim edib.
“Venesiya”nın bu bayramı klubun şəhərlə güclü vizual bağını bir daha göstərib. Su kanalları üzərində keçirilən çempionluq paradı futbol bayramından daha çox Venesiya kimliyini əks etdirən böyük şəhər tədbirinə çevrilib.
