ABŞ Prezidenti Donald Tramp Rusiyanın artıq beş ilə yaxındır Ukraynanın Avropadakı müttəfiqlərinə hücum etdiyini bəyan edib. Ağ Ev rəhbəri bu açıqlamanı Polşa rəsmilərinin Rusiyanın Avropa ölkələrinə mümkün hücumu ilə bağlı narahatlıqlarına münasibət bildirərkən verib.
MSNews.az xəbər verir ki, Tramp bu barədə sentyabrın 18-də Ağ Evdə jurnalistlərin suallarını cavablandırarkən danışıb.
Bu barədə “Ukrinska pravda” məlumat yayıb.
“Düşünürəm ki, onlar artıq Ukraynanın müttəfiqlərinə hücum ediblər. Təxminən beş ildir Ukraynanın müttəfiqlərinə hücum edirlər. Zənnimcə, hər kəs bununla razıdır”, – deyə ABŞ Prezidenti bildirib.
Trampın açıqlaması Polşa rəhbərliyinin Rusiyanın Ukraynaya dəstək verən Avropa ölkələrinə qarşı mümkün hücumları barədə xəbərdarlıqları fonunda səsləndirilib. “TVP World” nəşrinin məlumatına görə, Polşanın Baş naziri Donald Tusk qarşıdakı aylarda Rusiya tərəfindən hibrid hücumların və təhlükəsizlik insidentlərinin intensivləşə biləcəyi barədə xəbərdarlıq edib.
Polşalı jurnalistin ölkəsinin təhlükəsizliyi ilə bağlı əlavə sualına cavab verən Tramp Prezident Karol Navrotskinin vəziyyətə nəzarət etdiyini bildirib və onun fəaliyyətini müsbət qiymətləndirib.
Qeyd edək ki, Tramp açıqlamasında Rusiyanın Ukraynanın müttəfiqlərinə qarşı həyata keçirdiyini bildirdiyi hücumların konkret hansı hadisələri və ölkələri əhatə etdiyini açıqlamayıb. Onun sözlərinin Avropa dövlətlərinə qarşı birbaşa hərbi hücumlara, yoxsa hibrid təhdidlərə aid olduğu dəqiqləşdirilməyib.
