Məşhur Amerika animasiya serialı “South Park”ın yaradıcıları Trey Parker və Mett Stoun layihənin adını satirik şəkildə “South America” olaraq dəyişdiklərini açıqlayıblar. Qərar Donald Trampın ABŞ-da coğrafi obyektlərin adlarının dəyişdirilməsi təşəbbüslərinə açıq istehza xarakteri daşıyır.
MSNews.az xəbər verir ki, serialın rəsmi səhifəsi South Park Studios sentyabrın 9-da “29 ildən sonra “South Park” adını dəyişir” başlıqlı açıqlama yayıb. Trey Parker və Matt Stone bəyanatda bildiriblər:
“Apple və Google-un cəsarəti və vətənpərvərliyindən ilhamlanaraq “South Park”ın adını “SOUTH AMERICA” olaraq dəyişirik.”
Yaradıcılar həmçinin serialın sahibi olan “Paramount” şirkətinə də istehzalı şəkildə toxunaraq onu “Skydance Capitulation” adlandırıblar.
Associated Press bu addımı Tramp administrasiyasının son coğrafi ad dəyişikliklərinə qarşı növbəti siyasi satira kimi qiymətləndirir. Serial daha əvvəl də Tramp administrasiyasını və ABŞ siyasətini sərt şəkildə parodiya edən epizodlarla gündəmə gəlib.
Satiranın əsas hədəflərindən biri Ontario gölünün “Lake America” adlandırılmasıdır. Donald Tramp avqustun 27-də gölün ABŞ federal sistemlərində adının dəyişdirilməsi barədə sərəncam imzalayıb. Bundan sonra əvvəlcə “Google”, daha sonra “Apple” ABŞ istifadəçiləri üçün xəritələrində “Lake America” adından istifadə etməyə başlayıb.
Reuters məlumat verir ki, Kanadadakı istifadəçilər hələ də “Lake Ontario”, digər ölkələrdəki istifadəçilər isə hər iki adı görürlər.
Serialın 29-cu mövsümünün premyerası 16 sentyabr 2026-cı ildə “Comedy Central”da keçiriləcək. Yeni mövsümün Tramp administrasiyası və ABŞ siyasəti ilə bağlı satirik xətti davam etdirəcəyi gözlənilir.
